Qazaqstandyqtar memlekettik qyzmetterdi smartfonmen jıi ala bastady
ASTANA. KAZINFORM – Mobıldi servıster memlekettik qyzmetterdi alýdyń negizgi arnasyna aınalyp keledi. 2025 jyldyń basynan beri qazaqstandyqtar onlaın formatta 51,5 mln astam qyzmet alǵan, olardyń shamamen jartysy eGov Mobile mobıldi qosymshasy arqyly kórsetilgen, dep habarlaıdy Jasandy ıntellekt jáne tsıfrlyq damý mınıstrligi.
Búginde Qazaqstanda memlekettik qyzmetterdiń shamamen 90% onlaın formatta qoljetimdi. eGov.kz portalyna tirkelgen paıdalanýshylar sany 15,1 mln adamnan asady. Onyń ishinde 610 myń paıdalanýshy 2025 jyldyń basynda qosylǵan.
– eGov Mobile mobıldi qosymshasyn 11,7 mln astam qazaqstandyq paıdalanady, al aı saıynǵy belsendi aýdıtorııasy – 6,4 mln paıdalanýshy. Kún saıyn qosymshany 671 myńnan astam adam qoldanady. 2025 jyly azamattar úshin 220 tsıfrlyq servıs pen memlekettik qyzmet qoljetimdi boldy, – dep jazylǵan mınıstrlik habarlamasynda.
Negizgi anyqtamalar men qyzmetterden bólek, azamattar jańa tsıfrlyq quraldardy da belsendi paıdalanyp jatyr. Eń suranysqa ıe servısterdiń qatarynda bank qaryzdary men mıkrokredıt alýdan erikti bas tartý servısi, sottylyqtyń bar-joǵy týraly anyqtama jáne zańdy tulǵanyń tirkeý áreketteri týraly anyqtama bar.
2025 jyldyń maýsym aıynan bastap Qazaqstanda azamattardyń quqyq qorǵaý organdarymen ózara is-qımylyn qamtamasyz etetin «Zań men tártip» servısi engizildi. Bul servıs mobıldi qosymshalar arqyly qońyraý shalmaı nemese jeke barmaı-aq quqyqbuzýshylyqtar týraly jedel habarlaýǵa múmkindik beredi.
Tamyz aıynda eGov Mobile qosymshasyna sońǵy jyldardaǵy eń iri jańartý jasaldy. Negizgi jańashyldyq — jasandy ıntellekt tehnologııalaryna negizdelgen eGov AI ıntellektýaldy izdeý júıesi.
– 2025 jyly eGov.kz portaly arqyly qazaqstandyqtar 25,7 mln astam memlekettik qyzmet aldy. Portaldaǵy eń tanymal memlekettik qyzmetter qatarynda zeınetaqy aýdarymdary týraly anyqtama alý, emhanaǵa tirkelý, F-6 nysany (jyljymaıtyn múliktiń bar-joǵy týraly anyqtama) bar. Oǵan qosa, bıyl memlekettik onlaın-servısterdiń aqparattyq qaýipsizdik deńgeıin arttyrý jáne paıdalanýshylardyń derekterin alaıaqtardan qorǵaý jumystary kúsheıtildi, – deıdi vedomstvo.
Atap aıtqanda, 2025 jyldyń qazan aıynan bastap eGov.kz portalynda avtorızatsııalaý tártibi ózgertildi. Endi elektrondyq tsıfrlyq qoltańbamen (ETsQ) avtorızatsııanyń birinshi kezeńinen keıin paıdalanýshy 1414 nómirinen jiberiletin SMS-kod arqyly jeke basyn rastaýy qajet. Bul ózgerister eGov.kz portalyna, sondaı-aq onyń quramdas bólikterine (eOtinish servısi, «Ashyq úkimet» portaly) qatysty.
Sonymen birge, paıdalanýshylardyń yńǵaılylyǵy úshin logın men parol arqyly kirý múmkindigi de qoljetimdi boldy: paıdalanýshy JSN/BSN men qupııasózdi engizedi, al jeke basyn rastaý ETsQ kómegimen júzege asyrylady. Bul ózgerister elektrondyq úkimet portaly eGov.kz jáne onyń komponentterine (eOtinish servısi, Smart Bridge platformasy, «Ashyq úkimet» portaly) qoldanylady.
Buǵan deıin 2025 jyly Qazaqstandaǵy tsıfrlandyrý men jasandy ıntellektini damytý úshin qandaı sharalar atqarylǵanyn jazǵan edik.
