Jyl qorytyndysy boıynsha JІÓ-niń keminde 5 paıyz ósimin qamtamasyz etý qajet – Premer-mınıstr
ASTANA. KAZINFORM – Búgin Úkimet otyrysynda 2027-2029 jyldarǵa arnalǵan áleýmettik-ekonomıkalyq damý boljamy maquldandy.
- Kórsetkishterge qol jetkizý jáne bıýdjet qarajatyn tıimdi paıdalaný máseleleri Memleket basshysynyń turaqty baqylaýynda. Jeti aıda ekonomıkanyń ósýi 4,1 paıyz boldy. Jyl qorytyndysy boıynsha jalpy ishki ónimniń keminde 5 paıyz ósimin qamtamasyz etýimiz qajet. Boljamda ekonomıkadaǵy qazirgi jaǵdaı, damýdyń syrtqy faktorlary jáne halyqaralyq qarjy uıymdarynyń álemdik ekonomıkanyń ósýi men syrtqy naryqtardaǵy ahýalǵa qatysty baǵalaýy eskerilgen. Respýblıkalyq bıýdjet týraly zań jobasy halyqty áleýmettik qamtamasyz etý jáne ekonomıkalyq ósimdi yntalandyrý mindetterin sheshý kezinde makroekonomıkalyq turaqtylyqty saqtaý qajettiligin esepke ala otyryp ázirlendi. Sonymen qatar Memleket basshysynyń tapsyrmasyna sáıkes, 2027-2029 jyldarǵa arnalǵan bıýdjettiń negizgi basymdyqtarynyń biri — ınfraqurylymdyq jáne áleýmettik nysandardy ozyq qarqynmen salý, - dedi Premer-mınıstr Oljas Bektenov.
Osy oraıda ol barlyq memlekettik organdarǵa elimizdiń belgilengen áleýmettik-ekonomıkalyq damý kórsetkishterine qol jetkizýdi qamtamasyz etýdi tapsyrdy. Bıýdjettik baǵdarlamalar ákimshileriniń mindeti — jumsalǵan árbir teńgeden túsetin tabysty arttyrý, resýrstardy memlekettik mindettemelerdi oryndaýǵa, ekonomıkany, óńirlerdi jáne adam kapıtalyn damytýǵa baǵyttaı otyryp, qarjylyq tártipti kúsheıtý.
Aıta keteıik, Úkimet aldaǵy 3 jylda Ulttyq qordan 5 trln teńge nysanaly transfert almaq.
