Jyl basynda memlekettik borysh 27,2 trln teńgeni qurady
ASTANA. KAZINFORM – 2024 jylǵy 1 qańtardaǵy jaǵdaı boıynsha memlekettik borysh jalpy ishki ónimge shaqqanda 22,8 paıyzdy qurady. Bul týraly Májiliste 2023 jylǵa arnalǵan respýblıkalyq bıýdjettiń atqarylýy týraly Úkimet esebin baıandaǵan Qarjy vıtse-mınıstri Dáýren Temirbekov aıtty.
«Esepti jyly (2023 jyly) bıýdjet tapshylyǵy 3,1 trln teńge nemese jalpy ishki ónimge shaqqanda 2,6%. Bıýdjet tapshylyǵy ishki kózder esebinen qarjylandyryldy», - dedi D. Temirbekov.
Onyń aıtýynsha, 2024 jylǵy 1 qańtardaǵy jaǵdaı boıynsha memlekettik borysh 27,2 trln teńge nemese jalpy ishki ónimge shaqqanda 22,8 paıyzdy qurady. Onyń ishinde Úkimettiń boryshy jalpy ishki ónimge qaraǵanda 20,9% nemese 24,9 trln teńgeni qurady.
«Memlekettik boryshtyń joǵarǵy shegi Eýrazııalyq ekonomıkalyq odaqqa múshe elder úshin jalpy ishki ónimge 50 paıyzdan aspaıtyn deńgeıde belgilengen. Qazirgi kezde Memlekettik qarjyny basqarý tujyrymdamasynda belgilengen boryshtyq ındıkatorlar ruqsat etilgen mejede tur. 2024-2028 jyldarǵa arnalǵan boljamdar memlekettik borysh kórsetilgen jyldary lımıtten aspaıtynyn jáne jalpy ishki ónimge 25%, al úkimettik borysh jalpy ishki ónimge shaqqanda 21% deńgeıinde bolatynyn kórsetip otyr», - dedi vıtse-mınıstr.
