Jyl basynan jedel járdem brıgadalary 6,6 mln-nan astam shaqyrtýǵa barǵan

ASTANA. KAZINFORM — Bıylǵy jyldyń 10 aıynda jedel járdem brıgadalary 6,6 mln-nan astam shaqyrtýǵa qyzmet kórsetti. Ótken jyldyń sáıkes kezeńimen salystyrǵanda qońyraýlar sany 0,1%-ǵa tómendedi, dep habarlaıdy DSM baspasóz qyzmeti.

Jedel járdem qyzmetiniń dereginshe, bıyl alǵashqy 10 aıda shaqyrtýlar sanattary boıynsha mynadaı ózgerister baıqaldy:

1-sanat (eń jedel shaqyrtýlar):

356 myńnan astam jaǵdaı tirkeldi. Bul — ótken jylmen salystyrǵanda 0,5% kóp.

2-sanat:

Shaqyrtýlar sany 1,8% ósip, 2,1 mln-nan asty.

3-sanat:

Bul sanattaǵy shaqyrtýlar kólemi ózgerissiz qaldy — 1,9 mln-nan sál kóp.

4-sanat (shuǵyl emes shaqyrtýlar):

Ótinishter sany azaıǵanymen, qyzmet kórsetý tártibi ózgerdi.

Emhanalar janyndaǵy mobıldik brıgadalar bıyl 1,08 mln shaqyrtýǵa shyqty. Bul — ótken jylmen salystyrǵanda 23,2% az.

Al jedel járdem stantsııasy brıgadalary 4-sanat boıynsha 1 183 590 shaqyrtýǵa qyzmet kórsetti.

Eske sala keteıik, 4-sanattaǵy shaqyrtýlarǵa jumys kúnderi saǵat 8:00–20:00 aralyǵynda emhana mobıldik brıgadalary barady. Qalǵan ýaqytta bul sanattaǵy shaqyrtýlarǵa jedel járdem stantsııalary shyǵady.

Qazir respýblıka boıynsha jedel járdem qyzmeti:

• 20 derbes stantsııadan,

• 96 qalalyq qosalqy stantsııadan,

• 212 aýdandyq bólimsheden turady.

Barlyǵy 1 618 jedel járdem brıgadasy jumys isteıdi:

• 258-i — dárigerlik mamandandyrylǵan,

• 1 360-y — feldsherlik brıgada.
  Onyń ishinde qalalarda — 999, aýdandarda — 619 brıgada qyzmet kórsetedi.

4-sanattaǵy shaqyrtýlardy oryndaý úshin emhanalar janyndaǵy 580 mobıldik brıgada qosymsha jumyldyrylǵan.

Budan buryn keshki jáne túngi ýaqytta jedel járdem shaqyrý tarıfi ósetinin jazǵan edik.