Jyl basynda syrtqy saýda aınalymy 20 mlrd dollardan asty - Úkimet
ASTANA. KAZINFORM – Bıyl úsh aıda taýarlar eksporty 12 mlrd dollardy qurady. Bul týraly Úkimet otyrysynda QR Ulttyq ekonomıka birinshi vıtse-mınıstri Azamat Ámrın málim etti.
- Bıylǵy qańtar-aqpanda syrtqy saýda aınalymy 21,7 mlrd dollardy qurady. Taýarlar eksporty 12 mlrd dollardy, onyń ishinde óńdelgen taýarlardyń eksporty 4,5 mlrd dollardy qurady. Taýarlar ımporty 9,6 mlrd dollar boldy. 2,4 mlrd dollardan astam kólemde oń saýda balansy saqtalyp otyr, - dedi A. Ámrın.
Onyń aıtýynsha, osy jylǵy qańtar-naýryzda óńdeý ónerkásibindegi ósim 8,5%-ǵa deıin jedeldedi. Ósim 18 óńirde tirkeldi. Eń joǵary ósý Soltústik Qazaqstan, Túrkistan, Jetisý, Jambyl oblystarynda, sondaı-aq Almaty qalasynda baıqaldy. Al Aqmola jáne Shyǵys Qazaqstan oblystarynda óndiristiń tómendeýi tirkeldi.
- Byltyr ekonomıkadaǵy óńdeý ónerkásibiniń úlesi 12,7%-ǵa deıin ósti jáne ekinshi jyl taý-ken ónerkásibiniń úlesinen joǵary bolyp otyr. Munaı sektorynyń jalpy ishki ónimdegi úlesi eki esege tómendedi. 2010 jyly 16,5%-dan 2024 jyly 8,1%-ǵa deıin, - dedi vıtse-mınıstr.
Budan buryn habarlanǵandaı, kúrdeli syrtqy ekonomıkalyq ahýalǵa qaramastan shıkizattyq emes sektor básekege qabilettiligin kórsetti.
