Jyl basynan respýblıkalyq teatrlarǵa 170 myńnan asa kórermen bardy
ASTANA. KAZINFORM — Búginde elde 70-ten astam teatr jumys isteıdi, onyń 57-si — memlekettik teatrlar, dep habarlaıdy Mádenıet jáne aqparat mınıstrliginiń baspasóz qyzmeti.
27 naýryzda Dúnıejúzilik teatr kúni atalyp ótedi. Qazaqstan úshin bul aıtýly data teatr qyzmetkerleriniń kásibı merekesi ǵana emes, sonymen qatar teatr óneriniń júıeli damýyn, kórermen qyzyǵýshylyǵynyń artýyn jáne otandyq teatrlardyń shyǵarmashylyq belsendiliginiń keńeıýin aıshyqtaıtyn mańyzdy kún.
Búginde elde 70-ten astam teatr jumys isteıdi, onyń 57-si — memlekettik teatrlar. Olardyń 11-i respýblıkalyq jáne 46-sy óńirlik teatrlar sanatynda. Bul kórsetkishter teatr óneriniń eldiń mádenı ómirindegi eleýli ornyn aıqyndaı túsedi.
Máselen, 2025 jyly memlekettik teatrlarda 410 jańa qoıylymnyń premerasy ótti. Sonymen qatar respýblıka teatrlary 539 gastroldik sapar uıymdastyrdy, onyń ishinde 495-i Qazaqstan ishinde, 44-i shetelde ótti. Jyl boıy barlyǵy 16 myń qoıylym sahnalanyp, olardy 2 832 835 kórermen tamashalady.
— Teatr salasynyń ilgerileýi tek qoıylymdarmen emes, túrli festıvalderdegi tabystarmen de ólshenedi. 2025 jyly otandyq teatr qaıratkerleri 101 halyqaralyq jáne 90 respýblıkalyq festıvaldar men baıqaýlarǵa qatysty. Osy is-sharalardyń nátıjesi boıynsha qazaqstandyq teatrlardyń 13 qoıylymy «Gran-prı» jáne «Eń úzdik spektakl» nomınatsııalary boıynsha marapattaldy. Al 2026 jyldyń birinshi toqsanynda respýblıkalyq teatrlar 170 927 adamǵa qyzmet kórsetti. Bul kórermen suranysynyń turaqtylyǵy men aýdıtorııanyń joǵary qyzyǵýshylyǵyn kórsetedi, — delingen mınıstrlik habarlamasynda.
Jyl basynan beri respýblıkalyq teatrlarda «Qorǵansyz», «Qazaqı komedııa nemese Bonaparttyń úılenýi» jáne «Sholpannyń kúnási» spektaklderiniń premeralary ótti. Dúnıejúzilik teatr kúnine oraı birqatar premera men arnaıy sharalar josparlanǵan. Olardyń qatarynda «Astana Balet» teatryndaǵy «Bolero H» spektakli, Mıhaıl Lermontov atyndaǵy teatrdaǵy «Jenıtba (sovershenno neveroıatnoe snovıdenıe)» komedııasynyń premerasy, Quddys Qojamııarov atyndaǵy Uıǵyr mýzykalyq komedııa teatryndaǵy «Býnt nevestok» («Kelinder kóterilisi») spektakli jáne «Altyn Saqa — 2026» jańa qoıylymdar festıvali men Ǵabıt Músirepov atyndaǵy teatrdaǵy «Teatr túni» sharasy bar.
Budan buryn Prezıdent Qasym-Jomart Toqaev qaı óńirlerde teatr salynatynyn aıtty.
