Jyl basynan memlekettik shekarany zańsyz ótýge árekettengen 50 sheteldik ustaldy
ASTANA. KAZINFORM – 2024 jyldyń 4 aıynda 182,2 myń sheteldik elimizde ýaqytsha turýǵa ruqsat aldy. Bul týraly Senat depýtattarynyń saýalyna Premer-Mınıstrdiń orynbasary Tamara Dúısenovanyń jaýabynda aıtylǵan.
«Ýákiletti memlekettik organdar elde kóshi-qon baqylaýyn qamtamasyz etý maqsatynda qajetti sharalardy atqaryp jatyr. 2024 jyldyń 4 aıynda Qazaqstanǵa 4,2 mln sheteldik keldi, 4,0 mln sheteldik ketti», - dedi vıtse-premer.
Úkimet basshysy orynbasarynyń jaýabyna berilgen anyqtamaǵa sáıkes, elimizge kelgen sheteldikterdiń ishinde Ózbekstan azamattary basym – 1,7 mln adam (1,5 mln adam ketti). Odan keıin Qyrǵyzstannan 959,3 myń adam (950,6 myń adam ketti), Reseıden 794,8 myń adam (801,8 myń adam ketti), Tájikstannan 324,5 myń adam (316,8 myń adam ketti) keldi.
«Jyl basynan beri ýaqytsha turýǵa 182,2 myń ruqsat, onyń ishinde eńbek qyzmetin júzege asyrýǵa 160,1 myń ruqsat berildi. Іshki ister mınıstrliginiń aqparattyq júıelerinde Qazaqstan Respýblıkasynyń (Baıqońyr q.) jalǵa alynǵan aýmaqtarynda turatyn nemese jumys isteıtin kóship kelýshilerdi esepke alý shetel azamaty sol aýmaqtan tys jerge ketken kezde júzege asyrylady. Zańsyz kelgen sheteldikterdi anyqtaý maqsatynda ishki ister organdary turaqty negizde júrý marshrýttarynda jáne olardyń ýaqytsha turatyn jerlerinde tekserý ótkizedi. Ulttyq qaýipsizdik komıtetimen birge shekara mańyndaǵy óńirlerde (BQO, SQO, Jambyl, Túrkistan Aqtóbe, Atyraý jáne Qostanaı obl.) baqylaý kúsheıtildi», - dedi Tamara Dúısenova.
Jaýapqa berilgen qosymsha derekke qaraǵanda, memlekettik shekarany zańsyz ótýge árekettengeni úshin osy jyldyń basynan beri 50 sheteldik azamat ustaldy, 24 708 sheteldik ákimshilik jaýapkershilikke tartyldy, azamattyq sot isin júrgizý tártibimen elden 104 sheteldik azamat elden shyǵaryldy.
«Jalpy, qazirgi tańda sheteldikterdiń elge kelý jaǵdaılary boıynsha aıtarlyqtaı ósim baıqalmaıdy», - dedi ol.
