Jyl basynan Qostanaı oblysynda qansha jumys orny ashyldy
ASTANA. KAZINFORM — Qostanaı oblysy ekonomıkasynyń barlyq salasynda oń serpin bar. Bul týraly óńir ákimi Qumar Aqsaqalov málim etti.
— Bıylǵy 11 aıdyń qorytyndysy boıynsha Qostanaı oblysynda ekonomıkanyń barlyq salasynda oń serpin bar, sondyqtan el Prezıdentiniń 7% ósimge qol jetkizý jónindegi tapsyrmasy oryndalatyn bolady. Memleket basshysy 2024 jyly 6% ósimmen aıaqtaýdy tapsyrǵan, ony 8,3 paıyzǵa oryndadyq. Jyl basynan beri 24,1 myń jumys orny ashyldy. Ataýly áleýmettik kómek alatyn otbasylar sanynyń 23 paıyzǵa tómendeýine qol jetkizildi (1.01.2025 j. 2 319-dan 1.12.2025 j. 1 795-ke deıin), — dedi Qumar Aqsaqalov Ortalyq kommýnıkatsııalar qyzmetindegi baspasóz máslıhatynda.
Onyń aıtýynsha, Qostanaı oblysy mashına jasaý óndirisiniń kólemi boıynsha respýblıkada kósh bastap tur, ıaǵnı el óndirisiniń 25 paıyzdan astamyn qurady. Búginde oblys kásiporyndary óndiriske ınnovatsııalardy, tsıfrlyq tehnologııalardy belsendi túrde engizip, ónerkásiptik robottardy paıdalanyp jatyr. Máselen, 2025 jyly robottardyń sany 3 esege artyp, 133 ónerkásiptik robotty qurady, al 2023 jyly olardyń tek úsheýi ǵana bolatyn.
— «KamLitKZ» jaýapkershiligi shekteýli seriktestigi 500 jańa jumys ornyn ashý arqyly quny 78,2 mlrd teńge bolatyn shoıyn quıý zaýytynyń qurylysy jobasyn iske asyrdy. Taǵy bir iri zaýyt ashylýǵa daıyn. Ol júk kólikterine arnalǵan jetekshi beldikter shyǵaratyn zaýyty. Investıtsııa kólemi 160,5 mlrd teńge jáne 650 jańa jumys orny ashylady. Sondaı-aq, jeńil avtomobılderge avtokomponentter shyǵaratyn zaýyt salynyp jatyr. Munda 800 jumys orny ashylady. Investıtsııa kólemi — 17,8 mlrd teńge, — dedi ákim.
Buǵan deıin qaıtarylǵan aktıvter esebinen 4 myńǵa jýyq qostanaılyq taza sýmen qamtylatynyn jazǵan edik.