Jyl basynan kommýnaldyq tarıf neshe paıyzǵa ózgerdi
ASTANA. KAZINFORM — Jyl basynan beri elimizde kommýnaldyq tólemder neshe paıyzǵa ósti? Sonymen qatar, 2025 jyldyń sońyna deıin bul baǵytta tarıfter taǵy da ósýi múmkin be? Bul suraqtarǵa QR Ulttyq ekonomıka mınıstrliginen jaýap berdi.
Tabıǵı monopolııalar jáne qoǵamdyq mańyzy bar naryq salalaryndaǵy barlyq retteletin qyzmetterge tarıfter men baǵalardyń ózindik quny strategııalyq taýarlarǵa (otyn, kómir, mazýt, gaz, elektr energııasy jáne t. b.), ekonomıkanyń rettelmeıtin sektorlaryndaǵy materıaldar men shıkizatqa, bógde uıymdardyń taýarlary men qyzmetterine baǵanyń ósýi, syrtqy uıymdardyń taýarlary men qyzmetterine baǵanyń ózgerýi sııaqty, salyq stavkalary, abonentter sany, kórsetiletin qyzmetter kólemi, kásiporyn balansyndaǵy aktıvterdiń quny, jelilerdiń uzaqtyǵy jáne basqa da kóptegen faktordy eskere otyryp qalyptastyrylady.
— Munymen qosa, tarıfterdiń ózgerýi kásiporyn ınfraqurylymynyń jaı-kúıine, talap etiletin jóndeýge, kórsetiletin qyzmetterdiń shtat sanyna, kólemine baılanysty jeke tártippen qaralady, sondaı-aq árbir óńirdiń áleýmettik-ekonomıkalyq jaǵdaıy eskeriledi, QR Úkimeti bekitetin ınflıatsııalyq dáliz aıasynda tarıfti ulǵaıtýǵa jol beriledi. Nátıjesinde, osy jyldyń basynan tamyz aıyna deıin kommýnaldyq qyzmetter tarıfteriniń ortasha ósýi shamamen 18,4 paıyzdy qurady. Alaıda, jyl sońyna deıin tarıfterdiń odan ári ózgerýi týraly qazir aıtý erte. Onyń dınamıkasy tabıǵı monopolııalar sýbektilerimen berilgen ótinimderge, joǵaryda atalǵan faktorlardyń áserine, ınfraqurylymnyń tehnıkalyq jaı-kúıine, sondaı-aq óńirlerdegi áleýmettik-ekonomıkalyq jaǵdaıǵa baılanysty, — delingen mınıstrliktiń Kazinform agenttigine bergen jaýabynda.
Buǵan deıin kommýnaldyq qyzmetter tarıfi kelesi jyly 20-30 paıyzǵa kóteriletini málim boldy.