Jyl basynan qyzmetinen qýylǵan polıtseılerdiń sany belgili boldy

ASTANA. KAZINFORM — Jyl basynan beri teris sebeptermen 80-nen astam polıtseı qyzmetinen shyǵaryldy. Bul týraly Іshki ister mınıstrliginiń baspasóz qyzmeti málim etti. 

— 2025 jyldyń 9 aıynda quqyq qorǵaý organy qyzmetkerleriniń ádep kodeksi talaptary men qyzmettik tártipti buzǵany, quqyq qorǵaý organyna kir keltiretin teris qylyq jasaǵany jáne basqa da jaǵdaılar úshin ІІM jáne onyń óńirlik polıtsııa bólinisterimen tártiptik komıssııa otyrystary ótkizilip, sonyń sheshimi boıynsha kóptegen qyzmetker ártúrli deńgeıdegi tártiptik jaýapkershilikke tartyldy. Sondaı-aq, 82 qyzmetker teris sebepter boıynsha Іshki ister organynan shyǵaryldy, — delingen mınıstrliktiń Kazinform agenttigine bergen jaýabynda.

Osy oraıda Іshki ister mınıstrligi óz qyzmetin «Zań men Tártip» qaǵıdattaryna negizdeı otyryp, azamattardyń senimin aqtaıtyn, ádildik pen adaldyqty tý etken jańa formattaǵy kásibı júıeni qalyptastyrý baǵytyndaǵy jumystardy júıeli túrde jalǵastyryp kele jatqany atap ótildi.

— Bul sharalar elimizdegi qoǵamdyq tártip pen azamattardyń qaýipsizdigin qamtamasyz etýge, sondaı-aq polıtsııa qyzmetiniń bedelin arttyrýǵa baǵyttalǵan, — dep atalyp ótken vedomstvo aqparatynda.

Eske sala keteıik, jaqynda Іshki ister mınıstri Erjan Sádenov vedomstvo polıtsııa qataryn qyzmetine adal emes polıtseılerden tazartyp jatqanyn jáne qyzmette satqyndar bolmaýy kerek ekenin aıtqan edi.