Jyl basynan Qytaıda jumyssyzdyq deńgeıi 5,2% quraǵan

ASTANA. KAZINFORM — 2025 jyldyń birinshi jartyjyldyǵynda Qytaı qalalaryndaǵy jumyssyzdyq deńgeıi 5,2% boldy, dep jazady Sınhýa.

2025 jyldyń alǵashqy alty aıynda Qytaıdyń eńbek naryǵy jalpy alǵanda turaqty kúıde saqtaldy. Eldiń qalalary men qala tıpindegi eldi mekenderindegi zertteý nátıjeleri boıynsha jumyssyzdyqtyń ortasha deńgeıi 5,2 paıyzdy qurady. Bul — jyldyń birinshi toqsanymen salystyrǵanda 0,1 paıyzdyq pýnktke tómen. Bul týraly seısenbi kúni jarııalanǵan resmı derekterde aıtylǵan.

Qytaı Halyq Respýblıkasynyń Memlekettik statıstıka basqarmasynyń (MSB) málimetine sáıkes, 2025 jylǵy maýsymda eldegi qalalar men qala tıpindegi eldi mekenderdegi jumyssyzdyq deńgeıi 5 paıyz boldy.

Maýsym aıynyń sońyndaǵy jaǵdaı boıynsha eldegi aýyldan qalaǵa qonys aýdarǵan (mıgrant) sharýalar sany ótken jyldyń sáıkes kezeńimen salystyrǵanda 0,7 paıyzǵa ósip, 191,39 mıllıon adamǵa jetti.

— Qalalar men qala tıpindegi eldi mekenderde júrgizilgen saýalnamalarǵa sáıkes, bıylǵy aı saıynǵy jumyssyzdyq deńgeıi 5 pen 5,4 paıyz aralyǵynda aýytqyp, salystyrmaly túrde turaqty kúıde qaldy, — dedi Memlekettik statıstıka basqarmasy basshysynyń orynbasary Shen Laııýn baspasóz máslıhatynda.

Qytaı 2025 jylǵa arnalǵan maqsatty kórsetkishterge sáıkes, qalalar men qala tıpindegi eldi mekenderdegi jumyssyzdyq deńgeıin shamamen 5,5 paıyz kóleminde ustap turýdy josparlap otyr. Sonymen qatar, bul sanattaǵy eldi mekenderde 12 mıllıonnan astam jańa jumys orny qurylýy tıis.

Seısenbi kúni jarııalanǵan derekterge sáıkes, Qytaıdyń jalpy ishki ónimi (JІÓ) 2025 jyldyń birinshi jartyjyldyǵynda jyldyq eseppen 5,3 paıyzǵa ósken.

Osyǵan deıin Qytaıda eń iri aınalmaly elektr jetkizý jelisi salynǵany habarlandy.