Jyl basynan elordada 500-den astam órt tirkeldi
ASTANA. KAZINFORM — Elordadaǵy órttiń basym bóligi jeke turǵyn úı sektorynda tirkelip jatyr. Bul týraly Astana qalasy TJD memlekettik órt baqylaý basqarmasy bastyǵynyń orynbasary Ǵabıt Babaev aıtty.
— Jyl basynan beri 529 órt oqıǵasy tirkelgen. Onyń 225-i osy jeke turǵyn úı sektorlarynda boldy, ıaǵnı bul jalpy órttiń 42,5 paıyzyn qurady. Sonymen qatar, 2025 jyldyń 15 qazanynan 2026 jyldyń 15 sáýiri aralyǵynda — jylý berý maýsymynda jalpy jeke turǵyn úılerde 160-qa jýyq órt oqıǵasy tirkelgen. Órt saldarynan adam shyǵyny boldy, zardap shekken adamdar da bar, — dedi Ǵabıt Babaev Astana qalasy Kommýnıkatsııalar qyzmetindegi brıfıngide.
Osy oraıda ol jylytý maýsymy kezeńinde turǵyn úı sektorynda pesh jabdyqtaryna, elektr energııasy júıesine qatysty qaýipsizdik talaptarynyń saqtalýyna erekshe nazar aýdarylatynyn aıtty.
— Órttiń shyǵý sebepteri — ol peshti paıdalaný kezinde órt qaýipsizdigi talaptarynyń buzylýy, murjalardyń ýaqytyly tazalanbaýy, sondaı-aq turǵyndardyń qaýipsizdik sharalaryn saqtaýǵa nemquraıly qaraýy, elektr jabdyqtaryn durys paıdalanbaý jáne sapasyz jylytý qurylǵylaryn qoldaný. Budan bólek, balalardy qaraýsyz qaldyrý jaǵdaıdary jıi kezdesedi. Balalar otpen oınap, qaıǵyly jaǵdaılarǵa tap bolady. Astana qalasy boıynsha 983 áleýmettik turmysy tómen otbasy esepke alynǵan. Qazir órt qaýipsizdigi aılyǵy (15 tamyzdan 15 qyrkúıek aralyǵynda) aıasynda jergilikti atqarýshy organ ókilderimen, polıtsııa jáne tótenshe jaǵdaılar qyzmetkerlerimen birlesip 157 otbasynyń turǵyn úılerin aralap, qaýipsizdik sharalaryn túsindirdik. Bul rette 700-ge jýyq azamat qamtyldy. Osy úılerdi profılaktıkalyq aralaý barysynda órt qaýipsizdigi talaptaryn buzýdyń 38 deregi anyqtaldy. Onyń 15,8 paıyzy jylytý júıelerine, al 84,2 paıyzy elektr jelilerine qatysty, — dedi TJD ókili.
Bul turǵyda ol halyqtyń áleýmettik osal toptaryna jatatyn azamattardyń turǵyn úılerinde arnaıy datchıkter ornatylǵanyn aıtty.
— Buǵan deıin jalpy 3000-nan astam datchık ornatqanbyz. Qazir kóp turǵyn úıde datchıkter bar. Atalǵan órt qaýipsizdigi aılyǵynda esepte turǵan 983 otbasynyń turǵyn úılerin tolyq aralap shyǵamyz. Sonymen qatar ýly gazdy anyqtaıtyn datchıkter ornatamyz, — dedi Ǵabıt Babaev.
Aıta keteıik, tamyz aıynyń sońynda Qazaqstanda bir táýlikte 5 orman órti tirkeldi.
