Jyl basynan eldegi kóńil kóterý oryndaryn 1,8 myńǵa jýyq qylmys jasaldy

ASTANA. KAZINFORM — Іshki ister mınıstriniń orynbasary Sanjar Ádilov eldegi kóńil kóterý oryndaryndaǵy qylmystyń jaǵdaıyna qatysty pikir aıtty.

– Eldegi árbir ekinshi kisi óltirýdi, árbir úshinshi zorlaý deregin jáne buzaqylyqty kúdiktiler mas kúıinde jasaıdy. Árbir tórtinshi tonaý men jol-kólik oqıǵasy mas adamdardyń áreketine tıesili. Sonymen qatar, barlyq qylmystyń 60 paıyzy nemese 1048-i túnde jasalǵan, - dedi S.Ádilov Senatta Qazaqstan kásipkerleriniń quqyqtaryn qorǵaý jónindegi ýákilmen kezdesý kezinde.

Onyń aıtýynsha, mas adamdar jasaǵan qylmystyń kóbeıýine alkogoldiń emin-erkin satylýy, kóńil kóterý oryndary ıeleriniń qaýipsizdik erejelerin saqtamaýy, talaptardy oryndamaǵany úshin qatań jazanyń bolmaýy jáne oıyn-saýyq oryndarynyń túndegi jumys ýaqytynyń shektelmeýi áser etip otyr.

– Bıyl kóńil kóterý oryndarynyń talaptardy oryndamaýy boıynsha 42 myń shaǵym tústi. 11 aıdyń statıstıkasyna toqtalsaq, 1749 qylmystyq is tirkeldi. Eldegi árbir tórtinshi qylmysty adamdar mas kúıinde jasaǵan. Bul turǵyda kisi óltirýdiń 10 deregi, densaýlyǵyna zaqym keltirýdiń 579 oqıǵasy, zorlyq-zombylyq - 8, qaraqshylyq – 26, sondaı-aq 238 buzaqylyq deregi tirkelgen, - dedi mınıstrdiń orynbasary.

Buǵan deıin habarlanǵandaı, Іshki ister mınıstri Erjan Sádenov kóńil kóterý oryndarynda ishimdik satý ýaqytyn shekteý qajet ekenin aıtty.