Jyl basynan elde neshe fılm túsirildi

ASTANA. KAZINFORM — QR Mádenıet jáne aqparat mınıstrliginiń Mádenıet komıteti osy jyly elde túsirilgen fılmderge qatysty túsinik berdi.

- Bıyl memlekettiń qoldaýmen Kıno ortalyǵy arqyly 15 kınojoba túsirilimge jiberildi, - delingen Mádenıet komıtetiniń Kazinform agenttigine bergen jaýabynda.

Olardyń ishinde:

8 kórkem fılm: «Aqjeleń», «Búrkitshi», «Dnı», «Kenjem qaıda?», «38», «Trevojnaıa noch», «Saǵyndym seni», «Muǵalim»;

2 derekti fılm: «Venera. Baladan – baq, qamystan – qut», «Batyl bol»;

3 anımatsııalyq fılm: «Adamzatqa izdeý salamyn», «Jibek», «Komanda A.».

Sonymen qatar, túsirilimde ótken jyldan ótpeli 2 kınojoba bar, ıaǵnı «Pobedıteleı vıdno na starte» (birlesken joba) kórkem fılmi, «Alan týraly ańyz» anımatsııalyq fılmi bar.

- Qazirge deıin joǵaryda atalǵan 5 kórkem fılmniń túsirilim jumystary bitip, olardyń tolyq aıaqtalý merzimi 2026 jylǵa josparlanǵan. Sonymen qatar 1 derekti fılmniń túsirilimi tolyq aıaqtalyp, qalǵan kınojobalar áli óndiriste, - dep atalyp ótken vedomstvo aqparatynda.

Aıta keteıik, Mádenıet jáne aqparat mınıstrliginiń Mádenıet komıteti elimizde fılmdi qazaq tilinde dýblıajdaý kórsetkishine qatysty túsinik berdi.