Jyl basynan ekologııalyq zańnamany buzýdyń 7 myńnan astam deregi anyqtady - ІІM

ASTANA. KAZINFORM – Jyl basynan ekologııalyq zańnamany buzý deregi boıynsha 200-ge jýyq qylmystyq is qozǵaldy. Bul týraly Іshki ister mınıstrliginiń resmı ókili Shyńǵys Alekeshev aıtty.

«Іshki ister organdary brakonerlikke, aǵashtardy zańsyz kesýge, jer qoınaýyn óz betinshe paıdalanýǵa jáne qorshaǵan ortanyń lastanýyna qarsy turaqty túrde kúresin jalǵastyryp keledi. Polıtsııa «Bekire», «Ýyldyryq», «Kıik», «Brakoner» sııaqty tabıǵatty qorǵaýǵa baǵyttalǵan aktsııalardy únemi ótkizip jatyr. Jyl basynan beri tártip saqshylary ekologııalyq zańnamany buzýdyń 7 myńnan astam faktisin anyqtady. 200-ge jýyq qylmystyq is qozǵaldy», - dedi Sh. Alekeshev vedomstvoda ótken aptalyq brıfıngide.

Onyń aıtýynsha, zańsyz aınalymnan tyıym salynǵan 15 myń metrden astam aý, 9 tonna balyq jáne balyq ónimderi (onyń ishinde 1,2 tonna bekire), shamamen 3,5 myń aqbóken múıizi, 135 ańshy myltyǵy, sondaı-aq 81 tekshe metr zańsyz kesilgen aǵash tárkilendi.

«Balyq ónimderiniń zańsyz aınalymyna tosqaýyl qoıý maqsatynda 1 sáýirden bastap Jaıyq-Kaspıı basseıni aýmaǵynda «Bekire» jedel-profılaktıkalyq is-sharasy uıymdastyryldy. Sharaǵa Atyraý, Mańǵystaý, Batys Qazaqstan oblystarynyń polıtsııa departamentteri, batys óńirlik kólik polıtsııasynyń 300-ge jýyq qyzmetkeri jáne 28 tehnıkasy, sondaı-aq Ulttyq ulannyń áskerı qyzmetshileri jumyldyryldy. Máselen, Mańǵystaý oblysynda, Túpqaraǵan aýdanynda bir úıde tintý júrgizý barysynda jalpy salmaǵy 72 keli 13 bekire balyǵy tárkilendi. Atyraý oblysynda Jaıyq jaǵalaýyn patrýldeý kezinde kúdiktilerden 6 qapshyqqa salynǵan 30 bekire jáne sazan balyqtary tabylyp, «Bekire tuqymdas balyqty ósirý zaýytyna» tapsyryldy», - dedi resmı ókil.