Jyl basynan beri jol apatynan 137 bala qaza tapty
ASTANA. KAZINFORM — Jyl basynan beri elimizde balalardyń qatysýymen 5 myńnan astam jol-kólik oqıǵasy tirkeldi. Saldarynan 137 bala qaza taýyp, 6 myńǵa jýyq bala jaraqat aldy. Bul týraly QR ІІM Ákimshilik polıtsııa komıteti tóraǵasynyń orynbasary Quralaı Karına málimdedi.
Ortalyq kommýnıkatsııalar qyzmetinde ótken baspasóz máslıhatynda ol jańa oqý jyly qarsańynda balalardyń joldaǵy qaýipsizdigin qamtamasyz etý sharalaryna toqtaldy.
— Ókinishke qaraı, jyl basynan beri balalardyń qatysýymen 5 myńnan astam jol-kólik oqıǵasy tirkeldi. Sonyń saldarynan 137 bala qaza taýyp, 6 myńǵa jýyq bala jaraqat aldy, — dedi Quralaı Karına.
Onyń aıtýynsha, oqý jyly bastalǵan kezde kóshede balalar kóbeıip, mektep mańyndaǵy kólik qozǵalysy artady.
Osyǵan baılanysty 15-30 tamyz aralyǵynda respýblıka boıynsha «Nazar aýdaryńyz, balalar!» aktsııasy ótip jatyr. Onyń negizgi maqsaty — quqyq buzýshylyqtar men túrli oqıǵalardyń aldyn alý, balalardyń joldaǵy qaýipsizdigin qamtamasyz etý.
Quralaı Karına júrgizýshilerdi mektepter, jaıaý júrginshiler ótkelderi men balalar kóp jınalatyn oryndardyń mańynda barynsha saq bolýǵa shaqyrdy.
— Bala joldaǵy jaǵdaıdy durys baǵalamaýy múmkin. Sondyqtan júrgizýshi qaýipti aldyn ala boljap, jol-kólik oqıǵasyna jol bermeý úshin barlyq sharany qabyldaýy kerek, — dedi ol.
Aıta keteıik, Astanada jol erejesin buzǵan 19 myńnan astam jaıaý júrginshi jaýapqa tartyldy.
