Jyl basynan beri jastardy qylmysqa tartqan toptarǵa qarsy 47 is qozǵaldy - ІІM

ASTANA. KAZINFORM – Jyl basynan beri polıtsııa qyzmetkerleri jasóspirimder men jastar arasyndaǵy quqyq buzýshylyqtyń aldyn alý maqsatynda bilim berý uıymdarynda 2 myńnan astam profılaktıkalyq is-shara ótkizdi. Sonymen qatar óńirlerde jastarǵa keri yqpal etetin 40-tan astam top anyqtalyp, túrli qylmys pen quqyq buzýshylyq jasaǵany úshin 100-den astam adam ustaldy, dep habarlaıdy Polisia.kz.

jasóspirimder qylmysy
Foto: vıdeodan alynǵan skrın

Іshki ister mınıstrligi jasóspirimder men jastardy qylmystyq ortaǵa tartýdyń aldyn alý jumystaryn jalǵastyryp jatyr. Negizgi nazar qaýip-qaterdi erte anyqtaýǵa, bopsalaýǵa jáne qylmystyq ıdeologııanyń taralýyna jol bermeýge aýdarylǵan.

Oqýshylar men stýdentterdi bopsalaýdan qorǵaý baǵytynda da naqty sharalar qabyldandy. Kámeletke tolmaǵandarǵa qatysty osyndaı qylmystar jasaǵan tórt toptyń áreketine tosqaýyl qoıyldy.

Budan bólek, polıtsııa jastardy zańsyz áreketterge tartýǵa tyrysatyn uıymdasqan qylmystyq toptarǵa qarsy kúres júrgizip jatyr. Jyl basynan beri mundaı toptarǵa qatysty 47 qylmystyq is qozǵaldy. Qylmystyq toptardyń 240-tan astam múshesi jaýapqa tartylyp jatyr.

– Profılaktıkalyq jumystarmen qatar jastarǵa keri yqpal etetin adamdar men toptardyń qyzmetin toqtatý sharalary qabyldanyp jatyr. Bul sharalar qylmystyq qaýip-qaterdi ýaqtyly anyqtaýǵa, quqyqqa qaıshy áreketterdiń jolyn kesýge jáne jastardy qylmystyq yqpaldan qorǵaýǵa múmkindik beredi, – dedi ІІM Uıymdasqan qylmysqa qarsy kúres departamentiniń ókili Qýandyq Alpys.

Mınıstrlik bul baǵyttaǵy jumysty bilim berý uıymdarymen, ata-analarmen jáne qoǵammen birlesip jalǵastyrady. Basty maqsat – quqyq buzýshylyqtyń aldyn ala kezeńde jolyn kesip, «Zań men tártip» qaǵıdaty aıasynda óskeleń urpaq úshin qaýipsiz orta qalyptastyrý.

Osyǵan deıin Іshki ister mınıstrligi jasóspirimder qylmysynyń aldyn alý jumystary kúsheıtiletini týraly habarlaǵan bolatyn.