Jyl basynan beri «Januıa joly — Pýt semı» jobasyna 2 myńnan asa adam qatysty
ASTANA. KAZINFORM — Mádenıet jáne aqparat mınıstrliginiń bastamasymen elimizde «Januıa joly — Pýt semı» jobasy júzege asyrylyp keledi.
Mınıstrliktiń baspasóz qyzmeti atap ótkendeı, joba otbasy ınstıtýtyn nyǵaıtýǵa, jaýapty ata-ana mádenıetin qalyptastyrýǵa jáne otbasy qundylyqtaryn dáripteýge baǵyttalǵan. 2026 jyldyń alǵashqy jartyjyldyǵynda Qaraǵandy, Aqmola, Almaty oblystary men Almaty qalasynda 60 is-shara uıymdastyrylyp, oǵan 2 myńnan astam adam qatysty. Atap aıtqanda, ata-analarǵa, pedagogtarǵa jáne otbasymen jumys isteıtin mamandarǵa arnalǵan semınarlar, trenıngter, tájirıbelik sabaqtar men kezdesý alańdary ótti.
Maýsym aıynda ótken «Otbasy ınstıtýty: dıalog, seriktestik, damý» halyqaralyq forýmy da joba aıasyndaǵy mańyzdy is-sharalardyń biri boldy. Forým memlekettik organdardyń, halyqaralyq uıymdardyń jáne sarapshylar qaýymdastyǵynyń 200-ge jýyq ókiliniń basyn qosyp, jıynda otbasy ınstıtýtyn nyǵaıtýdyń zamanaýı tásilderi men úzdik tájirıbelerin talqylandy. Joba aıasynda otbasy qundylyqtaryn dáripteýge basymdyq beriledi. Osy maqsatta elimiz boıynsha «Ata-anamnyń mamandyǵyndaǵy bir kún» onlaın-aktsııasy uıymdastyryldy.
Sonymen qatar «Anamnyń alaqany» respýblıkalyq fotobaıqaýy ótti. Joba aıasynda ata-analarǵa arnalǵan ataana.kz platformasynyń mazmuny jańartyldy. Saıtta endi bala tárbıesine qatysty paıdaly keńester, ádistemelik materıaldar men usynymdar toptastyrylǵan. Budan bólek, joba aıasynda ata-analar men pedagogtarǵa arnalǵan 20 ádistemelik qural ázirlendi.
Aıta keteıik, «Januıa joly — Pýt semı» jobasyn Qazaqstan Respýblıkasy Mádenıet jáne aqparat mınıstrliginiń tapsyrysy boıynsha «Senim Qogamy» qoǵamdyq qory júzege asyryp keledi. Joba jyldyń sońyna deıin jalǵasady.
Buǵan deıin «Mereıli otbasy – 2026» ulttyq konkýrsyna qatysýǵa ótinim qabyldaý aıaqtalǵanyn jazǵanbyz.
