Jyl basynan beri jalǵan aqparat jarııalaý boıynsha 47 qylmystyq is tirkeldi
ASTANA. KAZINFORM – Jalǵan aqparat taratqany úshin jeti jylǵa deıin bas bostandyǵynan aıyrý jazasy kózdelgen.
Sońǵy ýaqytta áleýmettik jelilerde, messendjerlerde jáne basqa da onlaın-platformalarda ádeıi jalǵan aqparat taratyp, arandatýshylyq týdyrý jaǵdaılary jıilep ketti. Mundaı áreketter qoǵamdyq ahýaldy turaqsyzdandyryp, senimge selkeý túsirip, janjaldarǵa sebep bolyp otyr.
Feıkterdi taratý — qylmystyq jaýapkershilikke ákeletin is-áreket. Jalǵan aqparat taratqany úshin jeti jylǵa deıin bas bostandyǵynan aıyrý jazasy kózdelgen.
Tek jarty jyldyń ishinde jalǵan aqparat jarııalaý boıynsha 47 qylmystyq is tirkeldi.
Mysaly, Túrkistan oblysynda bir azamat áleýmettik jelilerde sheteldik ınvestorlarǵa jer berildi degen jalǵan aqparat taratqan. Sot úkimimen ol kináli dep tanylyp, jaýapqa tartyldy.
Ultaralyq, dinı nemese áleýmettik alaýyzdyqty qozdyrý faktileri de erekshe alańdaýshylyq týdyryp otyr. Bul — aýyr qylmys, ol úshin zańnamada 20 jylǵa deıin bas bostandyǵynan aıyrý jazasy qarastyrylǵan.
2025 jyldyń alǵashqy jartyjyldyǵynda osyndaı faktiler boıynsha 64 qylmystyq is qozǵaldy. 15 adam sottaldy, olardyń toǵyzyna bas bostandyǵynan aıyrý jazasy qarastyryldy.
Abaı oblysynyń turǵyny TikTok-ta ulttyq belgiler boıynsha balaǵat sózder aıtylǵan vıdeo taratqan; Qyzylorda oblysynyń turǵyny kópshilik aldynda dinı alaýyzdyqty qozdyrǵan.
Olardyń barlyǵy ustalyp, sot úkimi boıynsha jazalandy. Jalǵan aqparatty ınternette taratqany úshin qylmystyq jaýapkershilikpen qatar ákimshilik jaýapkershilik te bar. ÁQBtK-niń 456-2-baby boıynsha alty aıda 38 adam ákimshilik jaýapkershilikke tartyldy.
Atyraý oblysynda azamat damba qırady degen jalǵan vıdeony jarııalaǵan; Petropavlda belsendi túrmedegi sottalǵandar týraly jalǵan aqparat taratqan. Olardyń barlyǵy birneshe táýlikke ákimshilik qamaýǵa alyndy. ІІM zańdy buzatyn kez kelgen jarııalanym quqyqtyq jaýapkershilikke ákeletinin eskertedi.
— Barsha azamattardy zań talaptaryn saqtaýǵa jáne aqparat taratýda muqııat bolýǵa shaqyramyz. Árbir habarlama shynaıy, arazdyqqa shaqyrmaıtyn jáne qoǵamdyq tártipti buzbaıtyn bolýy tıis. Qoǵamdaǵy beıbitshilik, turaqtylyq pen senimdi tek ortaq quqyqtyq mádenıet jáne bir-birimizge degen qurmetti saqtaý arqyly qamtamasyz ete alamyz, — dep atap ótti vedomstvoda.
Aıta ketelik bas prokýrordyń orynbasary Jandos Ómirálıev jastar kóbine jalǵan aqparatty áleýmettik jelide bilmestikpen taratyp jatatynyn aıtqan edi.