Jyl basynan beri jalǵan aqparat taratqan 60-qa jýyq adam jaýapqa tartyldy
ASTANA. KAZINFORM – Qazaqstanda jalǵan aqparat taratý faktileri boıynsha quqyq qoldaný tájirıbesi qalyptasyp keledi.
Іshki ister mınıstrliginiń málimetinshe, 2026 jyldyń alǵashqy 5 aıynda QR ÁQBtK-niń 456-2-baby (Jalǵan aqparatty, quqyqqa qaıshy kontentti ornalastyrý, taratý) boıynsha 59 adam ákimshilik jaýapkershilikke tartyldy.
Sonymen qatar Qylmystyq kodekstiń 274-baby (Kórineý jalǵan aqparat taratý) boıynsha 20 qylmystyq is tirkelip, olardyń bir bóligi sotqa joldandy. Taldaý kórsetkendeı, jaýapkershilikke tartýǵa tek buqaralyq aqparat quraldaryndaǵy jarııalanymdar ǵana emes, sonymen birge áleýmettik jelilerdegi habarlamalar, pikirler, beınerolıkter jáne ózge de paıdalanýshy kontenti negiz bolýy múmkin.
Sońǵy mysaldardyń qatarynda, tótenshe jaǵdaılar týraly jalǵan málimetter taratý, shynaıy oqıǵa retinde kórsetilgen qoıylymdyq beınerolıkter jarııalaý, sondaı-aq memlekettik organdar men quqyq qorǵaý qurylymdarynyń qyzmeti týraly shyndyqqa janaspaıtyn aqparat taratý jaǵdaılary bar. Jasandy ıntellekt tehnologııalaryn qoldaný jaǵdaılaryna erekshe nazar aýdarylady. Neırojeliler arqyly sýretterdi, aýdıojazbalardy jáne beınerolıkterdi generatsııalaý avtordy olardy taratýdyń saldary úshin jaýapkershilikten bosatpaıdy.
Eger mundaı kontent azamattardy adastyrsa, úreı týǵyzsa nemese shynaıy oqıǵa retinde usynylsa, onyń jarııalanýyna mindetti túrde quqyqtyq baǵa beriledi. Árbir jarııalanymnyń naqty avtory bar, al kez kelgen rezonansty jalǵan aqparat sońynda tsıfrlyq iz qaldyrady.
Sot jáne ákimshilik tájirıbe kórsetkendeı, quqyqtyq sharalar paraqshanyń jazylýshylar sanyna, akkaýnttyń tanymaldyǵyna nemese qoldanylǵan tehnologııalarǵa qaramastan qabyldanady.
Jalǵan aqparatqa qarsy is-qımyl ortalyǵy kez kelgen tekserilmegen habarlamalarǵa syn kózqaraspen qarap, kúmándi derekkózderden alynǵan málimetterdi taratpaýdy usyndy.
- Esińizde bolsyn, aýdıtorııanyń nazaryn aýdarýǵa umtylý jarııalanatyn aqparattyń shynaıylyǵy men durystyǵy úshin zań aldynda jaýap berý mindetinen bosatpaıdy, - delingen habarlamada.
Aıyppul týraly jalǵan habarlama kelse ne isteý kerek ekenin jazǵan bolatynbyz.
