Jyl basynan beri zańsyz aınalymnan 578 kg esirtki tárkilendi
ASTANA. KAZINFORM – Astana qalasynyń prokýratýrasynda esirtki qylmysyna qarsy kúres máseleleri boıynsha Úılestirý keńesi ótti. Bul týraly prokýratýranyń baspasóz qyzmeti málim etti.
Qala prokýrory E.R. Ótegenov tóraǵalyǵymen zańdylyqty, quqyqtyq tártipti jáne qylmyskerlikke qarsy kúresti qamtamasyz etý jónindegi Úılestirý keńesiniń kezekti otyrysy ótti.
Otyrysta sońǵy úsh jyl ishinde esirtki qylmystaryn anyqtap ashý joǵary deńgeıde ekeni atap ótildi.
«Jyl basynan beri qalada esirtki zattarynyń zańsyz aınalymyna baılanysty 987 qylmystyq quqyq buzýshylyq tirkelgen, onyń 249 — ótkizý faktisi boıynsha. Zańsyz aınalymnan 578 kg esirtki tárkilenip, joıyldy, onyń ishinde mefedron — 254 kg, kannabıs — 224 kg, gashısh — 80 kg, kokaın — 48 gr. Prokýratýranyń úılestirýi negizinde quqyq qorǵaý organdarymen 3 esirtki zerthanalary anyqtaldy», — delingen habarlamada.
Tyıym salynǵan zattardy satý boıynsha jumys isteıtin 118 chattar men ınternet-arnalar buǵattaldy.
«Narkograffıtı qoldanýdyń kóptegen faktileri anyqtaldy, QK-niń 299-1-baby (esirtki, psıhotroptyq zattardy nemese sol tektesterdi, prekýrsorlardy nasıhattaý nemese zańsyz jarnamalaý) boıynsha 14 sotqa deıingi tergep-tekserý bastaldy. Bir tulǵa sottaldy», — dep habarlady prokýratýradan.
Úılestirý keńesiniń qorytyndysy boıynsha ýákiletti organdarǵa osy baǵyttaǵy jumysty kúsheıtý tapsyryldy. Onyń ishinde «Nashaqorlyqqa jol joq» aktsııasy sheńberinde is-sharalar ótkizý, sonymen qatar esirtki qylmysynyń aldyn alý maqsatynda keshendi sharalar ázirlendi, onyń ishinde patrýldik polıtsııa qyzmetiniń algorıtmin qurý, IT-mamandardy tartý, polıtsııa beketterin kúsheıtý jáne t. b. bar.
