Jyl basynan beri ulttyq parkterge 2 mıllıonǵa jýyq týrıst bardy
ASTANA. KAZINFORM – 2025 jyldyń qańtar-shilde aılarynda Qazaqstannyń ulttyq parkterin 2 mıllıonǵa jýyq adam tamashalady, dep habarlaıdy Kazakh Tourism ulttyq kompanııasy.
Bul kórsetkish elimizdegi tabıǵı jáne ekotýrızmge degen qyzyǵýshylyqtyń artyp kele jatqanyn ańǵartady.
Kelýshiler sany boıynsha kóshbasshy – «Býrabaı» memlekettik ulttyq tabıǵı parki. Aqmola oblysyndaǵy qaraǵaıly ormandarymen, ásem jartastary men kólderimen erekshelenetin bul aımaqqa 600 myńnan astam týrıst kelgen. «Qazaqstandyq Shveıtsarııa» atanǵan Býrabaı – otbasylyq demalys pen belsendi týrızmde suranysqa ıe baǵyt.
Ekinshi orynda – Іle-Alataý ulttyq parki. Almatyǵa jaqyn ornalasqan bul aýmaqty 507 541 týrıst aralaǵan. Taýly landshafttarymen, baı florasy men faýnasymen tanymal park ekologııalyq týrızm boıynsha eń suranysqa ıe oryndardyń biri sanalady.
Úzdik úshtikti «Kólsaı kólderi» ulttyq parki túıindeıdi. Almaty oblysyndaǵy bul tabıǵı nysanǵa 350 myńnan astam adam barǵan. Kólsaı men Qaıyńdy kólderi – parktiń basty tabıǵı nyshandary.
Sondaı-aq, týrıster arasynda Sharyn shatqaly ornalasqan ulttyq park pen Baıanaýyl ulttyq parki de keń tanymal. Sharyn fototýrızm men etnoekspedıtsııalarǵa qyzyǵýshylar úshin tartymdy bolsa, Pavlodar oblysyndaǵy Baıanaýyl Qazaqstandaǵy alǵashqy ulttyq park retinde jumsaq klımaty, taýly tabıǵaty jáne ásem kólderimen erekshelenedi.
Aıta keteıik, Jetisý oblysynda týrızmdi damytý basqarmasy qurylady.