Jyl basynan beri tutynýshylarǵa qansha qarajat qaıtaryldy
ASTANA. KAZINFORM — Bıylǵy birinshi jartyjyldyqta Astana qalasyndaǵy Saýda jáne tutynýshylardyń quqyqtaryn qorǵaý departamentine túsken ótinishter boıynsha tutynýshylarǵa 306 mıllıon teńgeden astam qarajat qaıtaryldy. Bul týraly departament basshysy Erkebulan Taǵashov málim etti.
— Jarty jyl ishinde 1 517 azamatqa qoldanystaǵy zańnama boıynsha túsindirme berildi. 2 435 jaǵdaıda tutynýshylardyń quqyqtary qorǵaldy. Al 918 azamat kásipkerlermen daýdy ózara kelisim arqyly sheship, ótinishterin qaıtaryp aldy, — dedi Erkebulan Taǵashov.
Onyń aıtýynsha, taǵy 1 281 ótinish quzyretti memlekettik organdarǵa joldanǵan. Qazirgi ýaqytta 549 ótinish qaralý satysynda.
— Qabyldanǵan sharalardyń nátıjesinde tutynýshylarǵa jalpy somasy 306 mıllıon teńgeden astam qarajat qaıtaryldy, — dedi departament basshysy.
Erkebulan Taǵashovtyń sózinshe, azamattar kóbine sapasyz taýarlardyń satylýyna, taýardy aıyrbastaýdan nemese qaıtarýdan bas tartýǵa, sondaı-aq jetkizý merziminiń buzylýyna baılanysty shaǵymdanǵan.
Sonymen qatar, sapasyz kórsetilgen qyzmetterge, shart talaptarynyń oryndalmaýyna, taýarlar men qyzmetter týraly tolyq emes nemese jalǵan aqparattyń berilýine qatysty ótinishter de jıi túsken.
—Azamattar qoǵamdyq tamaqtandyrý men jetkizý qyzmetterindegi zańbuzýshylyqtarǵa, ótkizilmegen is-sharalar úshin tólengen qarajatty qaıtarýǵa, sondaı-aq qashyqtan jáne elektrondyq saýdaǵa qatysty máseleler boıynsha da jıi shaǵymdanady, — dedi Erkebulan Taǵashov.
Aıta keteıik, buǵan deıin elordada tutynýshylardan túsken shaǵymdar sanynyń 55 paıyzǵa artqany týraly jazǵan edik.
