Jyl basynan beri temirjolda 20 qaýipti jaǵdaı tirkelgen
ASTANA. KAZINFORM — Jyl basynan beri QTJ mashınısteri temirjol ótkelderinde 20 jol-kólik oqıǵasynyń aldyn aldy.
Lokomotıv brıgadalarynyń qyraǵylyǵy men jedel áreketiniń arqasynda poıyzdar men kólikterdiń soqtyǵysýyna jol berilmeı, qozǵalys qaýipsizdigi qamtamasyz etildi.
Máselen, 1 mamyr kúni Moıynty — Shyǵanaq ýchaskesinde júk poıyzynyń mashınısi shuǵyl tejegishti qoldanyp, «Hova» júk kóligimen soqtyǵysýdyń aldyn alǵan. Ótkeldegi belgi berý júıesi durys jumys istep turǵan. Poıyz 16 mınýtqa keshikken.
21 sáýirde Shý — Taraz ýchaskesinde júk poıyzynyń mashınısi temirjol ótkeline shyǵyp ketken Jeep avtokóligin baıqap, shuǵyl tejeý arqyly apatty boldyrmaǵan. Osy jaǵdaıǵa baılanysty poıyz 10 mınýtqa keshikti.
25 sáýirde Moıynty — Shyǵanaq ýchaskesinde jolaýshylar poıyzynyń mashınısi jol erejesin buzǵan Chevrolet Cobalt kóligimen soqtyǵysýdyń aldyn aldy. Poıyzdyń keshigýi 4 mınýt bolǵan.
13 mamyrda Taraz — Shý jáne Jańaesil — Kókshetaý ýchaskelerinde de osyndaı eki jaǵdaı tirkeldi. Mashınıster ótkelge shyǵyp ketken jeńil kólikterdi baıqap, shuǵyl tejegishti qoldanǵan. Kólik júrgizýshileri oqıǵa ornynan ketip qalǵan.
19 mamyrda ıAnko — Saýmalkól ótkelinde KamAZ júk kóligi temirjol ótkelinde buzylyp qalyp, mashınıst shuǵyl tejeý arqyly apattyń aldyn alǵan.
Al 21 mamyrda Baýmanskaıa — Presnogorkovskaıa aralyǵynda júk poıyzynyń mashınısi temirjol ótkeline shyǵyp ketken fýramen soqtyǵyspaý úshin shuǵyl tejegishti qoldandy. Sonyń arqasynda apat bolmaǵan. Poıyz 12 mınýtqa keshikken.
QTJ málimetinshe, barlyq jaǵdaıda ótkelderdegi belgi berý qurylǵylary durys jumys istegen. Apat qaýpiniń basty sebebi — júrgizýshilerdiń jol júrý erejelerin óreskel buzýy.
Ótken jyly mashınıster 62 jol-kólik oqıǵasynyń aldyn alǵan. QTJ júrgizýshilerdi temirjol ótkelderinen ótý kezinde qaýipsizdik talaptaryn qatań saqtaýǵa shaqyrdy.
Budan buryn temirjol ótkelderindegi jol apaty 30%-ǵa azaıǵanyn jazǵanbyz.
