Jyl basynan beri sýıtsıd jasaǵan 14 jetkinshek mas bolǵan – QR ІІM
ASTANA. KAZINFORM – Jyl basynan beri sýıtsıd jasaǵan jáne soǵan árekettengen 14 jetkinshek mas kúıde bolǵan. Bul týraly QR Іshki ister mınıstrligi habarlady.
Sondaı-aq óz-ózine qol jumsaýǵa árekettengen bir jasóspirim esirtkilik masań kúıde bolǵan.
Taldaý kórsetkendeı, sýıtsıdter men sýıtsıd jasaýǵa árekettenýdiń basym bóligi 15-17 jas aralyǵynda, ıaǵnı ótpeli kezeńdegi jasóspirimderge tıesili.
«Qurmetti ata-analar, balalardyń minez-qulqy men emotsıonaldyq jaǵdaıyn baqylaýda ustańyzdar. Olarmen ashyq áńgimelesińizder. Qyzyǵýshylyqtary týraly bilip júrińizder. Ýaqyt bólip, barynsha qoldaýǵa tyrysyńyzdar. Balalardyń kóńil kúıindegi, minez-qulqyndaǵy nemese áleýmettik ortasyndaǵy ózgeristerge nazar aýdaryńyzdar. Jaı ǵana jylýlyq pen qamqorlyq tanytýdyń ózi qaıǵyly jaǵdaıdyń aldyn alýy múmkin», - dedi QR ІІM resmı ókili Shyńǵys Álekeshev.
Aıta keteıik, jyl basynan beri sýıtsıdtik belgileri bar 43 ınternet-resýrs anyqtaldy. Іshki ister mınıstrligi sońǵy ýaqytta messendjerlerde qaýipti oıyndar týraly aqparat taralǵanyn eskertken edi. Mundaı oıyndarda ózin-ózi óltirý elementteri kezdespeıdi, biraq, onda balalardyń psıhıkasyna teris áser etetin qashý, baǵynbaý sııaqty áreketterdi quptaý qaýpi bolýy múmkin.
