Jyl basynan beri sý zańnamasyn buzýshylardan 12 mln teńge óndirildi

ASTANA. KAZINFORM - 2024 jyldyń alǵashqy jarty jyldyǵynda sý zańnamasyn buzýshylardan shamamen 11,9 mln teńge óndirildi.

Sý resýrstary jáne ırrıgatsııa mınıstrliginiń basseındik ınspektsııalary 6 aıda sý zańnamasyn saqtaý boıynsha 55 tekseris júrgizdi. 103 quqyq buzýshylyq anyqtaldy, kemshilikterdi joıý boıynsha 42 nusqama berildi. 

Jalpy somasy 12,9 mln teńgege 143 ákimshilik aıyppul salyndy, 11,9 mln teńge kóleminde 127 ákimshilik aıyppul óndirildi, 16 ákimshilik is sotqa berildi.

«Mınıstrliktiń basseındik ınspektsııalary sý zańnamasynyń saqtalýyn qadaǵalaıdy. Quqyq buzýshylyqtarǵa qarsy kúresti kúsheıtý úshin Sý resýrstary jáne ırrıgatsııa mınıstrliginde Sý resýrstaryn retteý, qorǵaý jáne paıdalaný jóninde komıtet quryldy. Bul sý resýrstaryn zańsyz paıdalanýdyń aldyn alýǵa múmkindik beredi. Jaqynda ǵana Jambyl oblysynda tekseris júrgizildi. Onyń nátıjesi boıynsha materıaldar Bas prokýratýraǵa jiberildi. Sý salasyndaǵy ashyqtyq mınıstrlik jumysynyń basym baǵyttarynyń biri bolyp tabylady. Sondaı-aq komıtet sýdy zańsyz paıdalanýmen, ony esepke alý derekteriniń burmalanýymen jáne elimizdiń sý nysandaryndaǵy quqyqqa qaıshy sharýashylyq qyzmetpen kúresetin bolady», - dedi Sý resýrstary jáne ırrıgatsııa mınıstrliginiń resmı ókili Móldir Ábdýalıeva.