Jyl basynan beri sý zańnamasyn buzýdyń 896 deregi anyqtaldy
ASTANA. KAZINFORM – Qazaqstanda jyl basynan beri sý zańnamasyn buzýdyń 896 deregi anyqtaldy. Bul týraly Ortalyq kommýnıkatsııalar qyzmetinde ótken brıfıngte Sý resýrstaryn retteý, qorǵaý jáne paıdalaný komıtetiniń tóraǵasy Seıilbek Nurymbetov málimdedi.
Onyń aıtýynsha, Bas prokýratýramen birlesip ázirlengen zańsyz sý satý men satyp alýdyń aldyn alý jónindegi jol kartasy aıasynda monıtorıngtik toptar kún saıyn sý paıdalaný lımıtteriniń saqtalýyn baqylap, shartsyz nemese ruqsatsyz sý paıdalaný faktilerin anyqtap keledi.
– 2026 jyldyń ótken kezeńinde basseındik sý ınspektsııalary 454 tekserý júrgizip, sý zańnamasyn buzýdyń 896 deregin anyqtady. Nátıjesinde 183 nusqama berilip, jalpy somasy shamamen 155 mln teńgege 444 ákimshilik aıyppul salyndy. Sonymen qatar 56 materıal sottyń qaraýyna joldandy, – dedi Seıilbek Nurymbetov.
Komıtet tóraǵasynyń aıtýynsha, aldyn ala qabyldanǵan uıymdastyrýshylyq sharalar, transshekaralyq sý nysandary boıynsha halyqaralyq yntymaqtastyqtyń ýaqytyly júrgizilýi, sý berý rejımderiniń jedel rettelýi jáne sý paıdalanýǵa baqylaýdyń kúsheıtilýi vegetatsııalyq kezeńniń shtattyq rejımde ótýine múmkindik berip otyr.
Eske salaıyq, buǵan deıin bıylǵy sýarý maýsymyna bes ońtústik óńirge sý paıdalaný lımıti bekitilgeni habarlanǵan bolatyn.
