Jyl basynan beri PІB Medıtsınalyq ortalyǵynyń aýrýhanasy 25 myńnan asa naýqasty emdedi
ASTANA. KAZINFORM — QR PІB Medıtsınalyq ortalyǵynyń kópsalaly aýrýhanasy azamattarǵa memlekettik baǵdarlamalar aıasynda da, aqyly negizde de medıtsınalyq kómek kórsetedi. Bul týraly aýrýhananyń baspasóz qyzmeti málim etti.
Atalǵan kezeńde Aýrýhana statsıonarynda mindetti medıtsınalyq saqtandyrý (MÁMS) júıesi boıynsha 4063 patsıent em aldy. Qosymsha 5772 adam aqyly negizde medıtsınalyq kómekke júgindi.
2024 jylǵy 10 aıda Aýrýhana mamandary MÁMS boıynsha 3816 operatsııa, sondaı-aq kommertsııalyq negizde 1916 ota jasady, bul medıtsınalyq qyzmetterdiń sapasyna degen senim joǵary ekenin kórsetedi.
Patsıentter arasynda kardıologııa, terapııa jáne otorınolarıngologııa bólimderi kóbirek suranysqa ıe.
Sonymen qatar, Medortalyq aýrýhanasynyń ambýlatorııalyq-emhanalyq bólimshesinde 170 myńnan astam medıtsınalyq qyzmet kórsetildi.
Osy kezeńde Aýrýhananyń ıadrolyq medıtsına ortalyǵy memlekettik baǵdarlamalar aıasynda PET/KT jáne OFEKT/KT kómegimen 8223 patsıentke dıagnostıka júrgizdi. Taǵy 1698 adam aqyly negizde tekseristen ótti.
Medıtsınalyq kómekten basqa, Aýrýhana óńirlerde tehnologııa transferti men mamandardy oqytýǵa belsendi qatysady. Eki jyldan beri ótkizilip kele jatqan «QR PІB Medıtsınalyq ortalyǵynyń kúnderi» aktsııasy aıasynda Medortalyq aýrýhanasy mamandary syrqatty dıagnostıkalaý men emdeýdiń zamanaýı ádisterin úırete otyryp, óz tájirıbesin óńirlik dárigerlerge bólisedi.
— Epıleptologııa, allergologııa, arıtmologııa, kardıologııa, gastroenterologııa, neırohırýrgııa jáne basqa da mamandyqtar boıynsha joǵary bilikti dárigerler elimizdiń óńirlerine baryp, tegin konsýltatsııalar, operatsııalar, sondaı-aq bilim berý is-sharalary — dárister, semınarlar jáne praktıkalyq sheberlik saǵattaryn ótkizedi. Qazirgi ýaqytta Aýrýhana delegatsııasy Qazaqstannyń 13 óńirine bardy. Áriptesterimen birge olar 2,5 myńnan astam patsıentke konsýltatsııalyq-dıagnostıkalyq jáne medıtsınalyq kómek kórsetti, 250-ge jýyq operatsııa, onyń ishinde 70-ke jýyq biregeı operatsııa jasady, — delingen habarlamada.
QR PІB Medıtsınalyq ortalyǵynyń aýrýhanasy jumysyn jalǵastyra otyryp, elimizdegi jetekshi medıtsınalyq mekemelerdiń biri bolyp qala bermek. Sonymen qatar barlyq muqtaj janǵa sapaly medıtsınalyq kómek usynady.
Buǵan deıin Mańǵystaýda QR PІB Medıtsınalyq ortalyǵynyń dárigerleri tegin qabyldaý júrgizgeni habarlandy.
