Jyl basynan beri órt sóndirýshiler 1 myńnan asa jarylystyń aldyn aldy
ASTANA. KAZINFORM — Qutqarýshylar jyl basynan beri órt kezinde 1 459 gaz ballondy qaýipsiz jerge shyǵardy, onyń 385-i syıymdylyǵy 50 lıtrlik bolǵan, dep habarlaıdy TJM baspasóz qyzmeti.
Gaz ballondary bar úılerdegi órt óte qaýipti. Mundaı kezde qutqarýshylardyń jyldam jáne durys áreketi adam ómirin saqtap qalýy múmkin.
Órt sóndirýshiler óz ómirlerin qaýipke tigip, adamdardy qutqarýmen qatar, gaz ballondaryn órtten alyp shyǵyp, jarylystar men úlken zalaldardyń aldyn alady. Olar osylaısha kóptegen otbasy men úılerdi aman saqtap otyr.
— Azamattyq qorǵaý mamandary eskertedi: gaz ballondary bar oryndarda órt qaýipsizdigi — ár adamnyń jaýapkershiligi. Gaz qurylǵylaryn ornatý men paıdalaný erejelerin qatań saqtaý qajet. Bul jarylystar men órttiń aldyn alýǵa kómektesedi, — delingen habarlamada.
Tótenshe jaǵdaılar mınıstrligi gaz ballondaryn qaýipsiz qoldaný úshin kelesi erejelerdi usynady:
-
Ballondardy tek arnaıy toltyrý oryndarynda toltyryńyz. Gaz ballondaryn avtojanarmaı stantsııalarynda toltyrýǵa bolmaıdy.
-
Eki qabattan joǵary úılerde gaz ballondaryn qoldanbańyz.
-
Ballondardy jylytyp qoıýǵa bolmaıdy.
-
Eger gazdyń ıisi sezilse, gaz kranyn dereý jaýyp, úıdi jaqsylap jeldetińiz. Ashyq otty jaqpańyz, elektr qýatyn qospańyz.
-
Gaz qurylǵylaryn eshqashan qaraýsyz qaldyrmańyz.
-
Balalardyń gaz qurylǵylaryn óz betimen paıdalanýǵa jol bermeńiz.
-
Gaz shyǵyp turǵanyn tekserý úshin sabyn eritindisin qoldanyńyz.
Osyǵan deıin TJM qyzmetkerlerine kóterme jáne qosymsha tólemder qalaı tólenetinin jazǵanbyz.