Jyl basynan beri óndiriste 727 jumysshy zardap shekti
ASTANA. KAZINFORM — 2026 jyldyń alǵashqy alty aıynda Qazaqstan kásiporyndarynda eńbek qyzmetine baılanysty jazataıym oqıǵalardan 727 jumysshy zardap shekken. Bul byltyrǵy osy kezeńmen salystyrǵanda 24,5% kóp.
Eńbek jáne halyqty áleýmettik qorǵaý mınıstrliginiń málimetinshe, aýyr jaraqat alǵan jumysshylar sany da kóbeıgen. Byltyrǵy 409 adamnan bıyl 476 adamǵa deıin ósken, ıaǵnı 16,4% kóbeıgen.
Osyǵan baılanysty Memlekettik eńbek ınspektsııasy komıteti el boıynsha 500 myńnan astam jumys berýshige eńbek qaýipsizdigi men eńbekti qorǵaýdy kúsheıtý jóninde usynymdar joldady.
— Taldaý nátıjesinde óndiristik jaraqattanýdyń negizgi sebepteri retinde jumystardy qaýipsiz oryndaýdy uıymdastyrýdyń jetkiliksizdigi, qaýipsizdik talaptarynyń saqtalýyna baqylaýdyń bolmaýy, aqaýly jabdyqtardy paıdalaný jáne qaýiptiligi joǵary jumystardy júrgizý kezinde talaptardy buzý anyqtalǵan. Sondaı-aq nusqama berý men jumyskerlerdi oqytýǵa formaldy qaraý, jeke qorǵanysh quraldarymen qamtamasyz etpeý nemese olardy qoldanbaý, jumys oryndarynyń jaı-kúıin jetkilikti baqylamaý da jazataıym oqıǵalarǵa sebep bolyp otyr, — delingen habarlamada.
Mınıstrlik jumys berýshilerge eńbek qaýipsizdigi men eńbekti qorǵaý boıynsha ishki baqylaýdy kúsheıtýdi usyndy. Atap aıtqanda, jumyskerlerdi turaqty oqytyp, nusqama berip, bilimin tekserý, mindetti medıtsınalyq tekserýlerden ýaqytyly ótkizýdi qamtamasyz etý, jaramdy jeke jáne ujymdyq qorǵanysh quraldarymen qamtý, kásiptik táýekelderdi anyqtap, olardy tómendetý sharalaryn qabyldaý qajet.
Jumys berýshiler eńbek qatynastaryn zań talaptaryna saı rásimdep, eńbek sharttary týraly aqparatty Eńbek sharttaryn esepke alýdyń biryńǵaı júıesine ýaqytyly engizýge jáne jumyskerlerdi jazataıym oqıǵalardan mindetti túrde saqtandyrýǵa tıis.
Kámeletke tolmaǵan jumyskerlerdiń quqyqtarynyń saqtalýyna da erekshe nazar aýdarylýy kerek. 18 jasqa tolmaǵandardy aýyr, zııandy jáne qaýipti jumystarǵa, sondaı-aq túngi jáne ústeme jumystarǵa tartýǵa shekteý qoıylǵan.
Eńbek qyzmetine baılanysty jazataıym oqıǵa bolǵan jaǵdaıda, jumys berýshi zardap shekken adamǵa alǵashqy medıtsınalyq kómek kórsetýge, oqıǵa ornyndaǵy jaǵdaıdy saqtaýǵa jáne zańnamada belgilengen tártippen tergep-tekserýdi qamtamasyz etýge mindetti. Oqıǵa týraly memlekettik eńbek ınspektsııasynyń tıisti aýmaqtyq bólimshesine bir táýlik ishinde habarlaýy qajet.
Eske salaıyq, buǵan deıin Qaraǵandy oblysyndaǵy eki óndiristik apattan úsh adam kóz jumǵanyn habarlaǵanbyz.
