Jyl basynan beri óńdeý ónerkásibi óndirisiniń kólemi 8,7%-ǵa ósti
ASTANA. KAZINFORM - Premer-mınıstr Oljas Bektenov el ekonomıkasyn damytý máselesi jóninde jumys keńesin ótkizdi. Basqosýda ónerkásiptiń ósýin qamtamasyz etý sharalaryna nazar aýdaryldy. Bul týraly Úkimettiń baspasóz qyzmeti habarlady.
Ónerkásip jáne qurylys mınıstri Ersaıyn Naǵaspaev Memleket basshysynyń óndiris kólemin ulǵaıtý men ósý úrdisin bekitý boıynsha tapsyrmalaryn oryndaý aıasynda atqarylyp jatqan jumystar týraly baıandady.
Bıylǵy qańtar-naýryz aılarynda óńdeý ónerkásibinde turaqty oń serpin 8,7% deńgeıinde saqtalyp otyr. Negizgi ósim mashına jasaý (17,7%), tamaq óndirisi (13,2%), mashınalar men jabdyqtardy qospaǵanda, daıyn metall buıymdary (28,7%) salalaryndaǵy kórsetkishterdiń ósýi arqasynda qamtamasyz etilgen. Sonymen qatar taý-ken ónerkásibinde ósim (6,1%) baıqaldy.
Qurylys salasynda toqsandyq qorytyndy negizinde ósý kórsetkishi 16,9%-ǵa jetti. Mektepter, avtokólik joldary, temirjol jelileri, ınjenerlik ınfraqurylym qurylysy boıynsha jumys kóleminiń artýy týraly baıandaldy.
Premer-mınıstr otandyq óndiristermen, onyń ishinde Energetıkalyq jáne kommýnaldyq sektorlardy jańǵyrtý jónindegi ulttyq jobany júzege asyrý sheńberinde ózara is-qımyldy arttyrý boıynsha birqatar tapsyrma berdi.
Anyqtama: QR Strategııalyq josparlaý jáne reformalar agenttigi Ulttyq statıstıka bıýrosynyń aldyn ala derekteri boıynsha, bıylǵy qańtar-naýryz aılarynda JІÓ ótken jyldyń sáıkes kezeńimen salystyrǵanda 5,8%-dy qurady. Naqty kólem ındeksi kólik salasynda – 21%-dy, qurylysta – 16,9%-dy, ónerkásipte – 6,6%-dy, saýdada – 6,3%-dy quraıdy.