Jyl basynan beri múgedek jandardan 16 myńnan astam aryz-shaǵym tústi – Úkimet otyrysy
ASTANA. KAZINFORM – Jyl basynan beri memlekettik organdarǵa múgedektigi bar adamdardan 16 myńnan astam aryz-shaǵym kelip túsken. Bul týraly Úkimet basshysy Oljas Bektenov málim etti.
«Aýyr patologııasy bar balalardy erte anyqtaý, olardy emdeý jáne ońaltý máseleleri de ózekti. Densaýlyq saqtaý mınıstrligi múgedektiktiń aldyn alý úshin erte dıagnostıkalaý jáne erte em kórsetý jónindegi jumystardy sapaly turǵyda jaqsartqany jón. Pedagogterdiń bári birdeı múgedektigi bar balalarmen jumys isteı almaıtyny jasyryn emes. Ondaı sanattaǵy balalardyń bilim alýy úshin úlken mektepterdi beıimdeý de kúrdeli sharýa», - dedi Oljas Bektenov Úkimet otyrysynda.
Osy oraıda Premer-mınıstr Oqý-aǵartý mınıstrligi men Ǵylym jáne joǵary bilim mınıstrlikterine erekshe qajettilikteri bar balalarmen jumys isteıtin pedagogterdi daıarlaýdy túbegeıli jaqsartýdy tapsyrdy.
«Jyl basynan beri memlekettik organdarǵa múgedektigi bar adamdardan 16 myńnan astam aryz-shaǵym kelip túsken. Olardyń negizgi bóligi saraptama júrgizýge, qaıta kýálandyrýǵa, ońaltýǵa jáne jumysqa ornalasýǵa baılanysty. Sondyqtan barlyq áleýmettik qyzmetter óz jumysyn jandandyryp, árbir problemany tikeleı qaraýy kerek», - deıdi O. Bektenov.
Aıta keteıik, Premer-mınıstr elimizdegi múgedek jandar úshin jasalyp jatqan jumystardy mardymsyz dep baǵalady.
