Jyl basynan beri memleket menshigindegi 380 nysan satylǵan
Qańtar-qarasha aılarynda memleket menshigindegi 380 nysan jekeshelendirýge berildi. Bul týraly QR Qarjy mınıstri Erulan Jamaýbaev aıtyp berdi, dep habarlaıdy Kazinform.
Mınıstrdiń aıtýynsha, Jekeshelendirýdiń 2021-2025 jyldarǵa arnalǵan keshendi josparynda 658 obektini satý kózdelgen.
«Bıylǵy qańtar-qarasha aılarynda 330 mlrd teńge somasyna 380 obekti satyldy jáne keıinnen satyp alý quqyǵymen senimgerlik basqarýǵa berildi. Taǵy 30 obekti satýǵa qoıyldy, 64 nysan qaıta uıymdastyrýǵa jáne taratýǵa jiberildi», - dedi Erulan Jamaýbaev Úkimettiń búgingi otyrysynda.
Sonymen birge, spıkerdiń aıtýynsha, 184-i satý aldyndaǵy daıyndyqta tur.
Buǵan deıin spıker qaı mınıstrlikter men oblystar bıýdjet qarajatyn ıgere almaǵanyn aıtqan edi.
Sondaı-aq memlekettik bıýdjetke 18,2 trln teńge túsken, jyl basynan beri jergilikti bıýdjetterge túsken kirister jospardan asyra oryndalǵan.
