Jyl basynan beri Mansap Kompasy tsıfrlyq platformasynda 22,5 myń oqýshy testileýden ótti
ASTANA. KAZINFORM - Byltyrdan bastap Mansap Kompasy tsıfrlyq platformasynda bilim berý jáne kásibı traektorııany tańdaýǵa baǵyttalǵan kásibı dıagnostıka jáne mansaptyq baǵdarlaý quraly engizilgen bolatyn. 2026 jyldyń basynan beri platformany odan ári damytý jáne aýqymyn keńeıtý jumystary júıeli túrde jalǵasýda. Osy ýaqyt ishinde testileýden 22,5 myń bilim alýshy ótti.
QR Eńbek jáne halyqty áleýmettik qorǵaý mınıstrligi bapasóz qyzmetiniń habarlaýynsha, byltyr osyndaı testti 7-11 synyptardaǵy 116,5 myń oqýshy tapsyrǵan.
Platformanyń fýnktsıonaly halyqaralyq baǵalaý ádistemeleri negizinde paıdalanýshynyń kásibı baǵyttarǵa degen beıimdiligi men qyzyǵýshylyqtaryn anyqtaýǵa múmkindik beredi. Testileý nátıjeleri boıynsha júıe avtomatty túrde mamandyq tańdaýǵa qatysty jeke usynymdar qalyptastyryp, sondaı-aq bilim alý múmkindikteri men qajetti daǵdylardy damytý joldary týraly aqparat usynady.
Platforma bastapqy dıagnostıka júrgizýdi qamtamasyz etip qana qoımaı, mamandyqtar jáne eńbek naryǵy týraly ózekti málimettermen tanysýǵa jol ashady.
Óńirlik úılestirýshiler men kásibı baǵdar berýshi pedagogterdi de oqytý júrgizildi, paıdalanýshylardy súıemeldeý tetikteri jolǵa qoıyldy, sondaı-aq óńirler men bilim berý uıymdary bólinisinde nátıjelerdi sholý jáne taldaý quraldary engizildi.
2026 jyly platformanyń fýnktsıonalyn odan ári keńeıtý, nysanaly toptardy, onyń ishinde halyqtyń ártúrli sanattaryn qamtýdy arttyrý, sondaı-aq bilim berý baǵdarlamalary jáne eńbek naryǵy derekterimen ıntegratsııany kúsheıtý josparlanyp otyr.
Osyǵan deıin mamandyq tańdaýǵa kómektesetin jańa platforma iske qosylǵany týraly jazdyq.
