Jyl basynan beri qos azamattyǵy bar 91 adam shekaradan ótpek bolǵan
ASTANA. KAZINFORM – Ustalǵandar isi qaraý úshin polıtsııa organdaryna berildi, dep habarlaıdy UQK baspasóz qyzmeti
2025 jyldyń basynan UQK Shekara qyzmeti ótkizý pýnktterinde bir mezgilde Qazaqstan Respýblıkasynyń jáne basqa memlekettiń azamattyǵy bar adamdardyń shekaradan ótýiniń 91 faktisin anyqtady.
— Ustalǵandar isi qaraý úshin polıtsııa organdaryna berildi. Aıta ketý kerek, 2024 jyly Memlekettik shekarada 1190 qos azamattyq faktisi anyqtaldy. Quqyq buzýshylyqtardyń negizgi bóligi jaqyn shetel azamattaryna tıesili boldy. UQK Shekara qyzmeti qazaqstandyq zańnamaǵa sáıkes qos azamattyqtyń bolýy 300 aılyq eseptik kórsetkishke deıin aıyppul salýǵa nemese ákimshilik jolmen shyǵaryp jiberýge ákeletinin eske salady, — delingen vedomstvo habarlamasynda.
Bul rette qazaqstandyqtardyń basqa memlekettiń azamattyǵyn alýy Qazaqstan Respýblıkasynyń azamattyǵynan aıyrý úshin tikeleı negiz bolyp tabylady.
Buǵan deıin habarlanǵandaı, UQK ońtústik oblystardan Astanaǵa esirtki jetkizetin arnanyń jolyn kesti.