Kópbalaly otbasylar men nagradtalǵan analar 354 mlrd teńge járdemaqy aldy
ASTANA. KAZINFORM – 2025 jyldyń basynan bastap kópbalaly otbasylarǵa jáne nagradtalǵan analarǵa beriletin memlekettik járdemaqylarmen jalpy somasy 354,5 mlrd teńge mólsherinde orta eseppen 856,2 myń otbasy qamtylǵan. Bul týraly Eńbek jáne halyqty áleýmettik qorǵaý mınıstrligi málim etti.
Vedomstvonyń dereginshe, járdemaqymen qamtylǵan otbasylardyń ishinde kópbalaly otbasylarǵa beriletin járdemaqymen — 308,9 mlrd teńge somasyna 613,4 myń otbasy; nagradtalǵan analarǵa beriletin járdemaqymen — 45,6 mlrd teńge somasyna 242,8 myń adam qamtylypty.
2025 jyldyń shilde aıynda joǵaryda atalǵan járdemaqylarmen jalpy somasy 49,7 mlrd teńge mólsherinde 846,1 myń otbasy, onyń ishinde: kópbalaly otbasylarǵa beriletin járdemaqymen 43,1 mlrd teńge somasyna 601,2 myń otbasy; nagradtalǵan anaǵa beriletin járdemaqymen 6,6 mlrd teńge somasyna 244,9 myń adam qamtyldy.
Kópbalaly otbasyǵa beriletin memlekettik járdemaqyǵa 4 jáne odan da kóp birge turatyn kámeletke tolmaǵan nemese 23 jasqa deıingi kúndizgi bólimde oqıtyn stýdent balalary bar otbasylar tabysyna qaramastan úmitker bola alady.
Tólem mólsheri bala sanyna qaraı eseptelip tólenedi jáne 2025 jyly:
— 4 balasy bar otbasylarǵa — 16,03 AEK nemese 63 030 teńge;
— 5 balaǵa — 20,04 AEK nemese 78 798 teńge;
— 6 balaǵa — 24,05 AEK nemese 94 565 teńge;
— 7 balaǵa — 28,06 AEK nemese 110 332 teńge;
— 8 jáne odan da kóp balasy bar otbasylarǵa — ár balaǵa 4 AEK nemese
15 728 teńge mólsherin quraıdy.
Nagradtalǵan anaǵa beriletin járdemaqy «Altyn alqa», «Kúmis alqa» alqalarymen nagradtalǵan nemese buryn «Batyr ana» ataǵyn alǵan, І jáne ІІ dárejeli «Ana dańqy» ordenderimen nagradtalǵan analarǵa taǵaıyndalady.
Nagradtalǵan anaǵa beriletin járdemaqy aı saıyn kelesi mólsherde tólenedi:
- «Kúmis alqa» alqasymen nagradtalǵan analarǵa — 6,40 AEK nemese 25 165 teńge;
- «Altyn alqa» alqasymen nagradtalǵan nemese buryn «Batyr Ana» ataǵyn alǵan, І jáne ІІ dárejeli «Ana dańqy» ordenderimen nagradtalǵan analarǵa — 7,40 AEK nemese 29 097 teńge.
2025 jylǵy 1 qańtardan bastap balaly otbasylarǵa taǵaıyndalatyn memlekettik járdemaqylardyń mólsheri 6,5%-ǵa artqanyn atap ótemiz.
Al múgedekterge áleýmettik qoldaý aıasynda 285,7 mlrd teńgege járdemaqy tólendi.