Jyl basynan beri qyzylshanyń 515, kókjóteldiń 129 jaǵdaıy tirkeldi — DSM
ASTANA. KAZINFORM — Eldegi epıdemıologııalyq jaǵdaı ınfektsııalardyń barlyq negizgi túri boıynsha turaqty bolyp tur. Bul týraly Densaýlyq saqtaý mınıstrliginiń baspasóz qyzmeti habarlady.
— Elde tyrysqaq, oba, týlıaremııa, sibir jarasy, leptospıroz, lısterıoz, Kongo-Qyrym gemorragııalyq qyzbasy, Denge bezgegi, qutyrý aýrýlary tirkelmegen, — delingen habarlamada.
Immýndaýdy kúsheıtý jónindegi sharalar, profılaktıkalyq jáne epıdemııaǵa qarsy is-sharalar qyzylsha boıynsha jaǵdaıdy turaqtandyrýǵa múmkindik berdi.
— Jyl basynan bastap respýblıka boıynsha qyzylshanyń 515 jaǵdaıy tirkeldi, onyń ishinde aqpan aıynda 229 jaǵdaı anyqtaldy, bul 2024 jylǵy uqsas kezeńmen salystyrǵanda 98,2%-ǵa tómen. Sońǵy aptada qyzylshanyń 73 jaǵdaıy tirkeldi. Jyl basynan beri kókjóteldiń 129 jaǵdaıy tirkeldi, onyń ishinde aqpan aıynda — 49 jaǵdaı, bul syrqattanýshylyq deńgeıiniń 49%-ǵa tómendegenin kórsetedi. Ótken aptada kókjóteldiń 7 jaǵdaıy tirkeldi, — delingen DSM habarlamasynda.
Qyzylsha men kókjóteldiń kóptegen jaǵdaıy vaktsınatsııalanbaǵan balalardyń arasynda tirkeledi.
Vaktsınatsııamen qamtýdy monıtorıngteý, vaktsınalardyń qozǵalysyn esepke alý jáne olardy saqtaý úshin mınıstrlik profılaktıkalyq ekpeni esepke alý júıesin jáne barlyq deńgeıdegi sýyqtyq tizbegi júıesin tsıfrlandyrýdy júrgizýde.
Aǵymdaǵy epıdemıologııalyq maýsymnyń basynan bastap respýblıkada JRVI-diń 3,6 mln astam jaǵdaıy tirkeldi, bul ótken maýsymnyń uqsas kezeńine qaraǵanda 13%-ǵa az. Osy epıdemıologııalyq maýsymda zerthanalyq rastalǵan tumaýdyń 2934 jaǵdaıy tirkeldi, bul ótken epıdemıologııalyq maýsymnyń deńgeıine sáıkes keledi.
Tumaýǵa qarsy 2,3 mln astam adamǵa ekpe salyndy, bul el halqynyń 11,6%-y, DDU usynǵan jaǵdaıda keminde 10%.
Aǵymdaǵy epıdemııalyq maýsymnyń basynan bastap respýblıka boıynsha JRVI týdyratyn vırýstarǵa 15 270 úlgi zertteldi, ártúrli vırýstardyń, sonyń ishinde rınovırýs, vırýs, adenovırýs, paratumaý, metapnevmovırýs, bokavırýs jáne basqalardyń aınalymy belgilendi.
2025 jyldyń basynan beri elde COVID-19 koronavırýstyq ınfektsııasynyń 174 jaǵdaıy tirkeldi (169 KVI+ jaǵdaıy, 5 KVI-jaǵdaı), ólim jaǵdaılary joq. Ótken jyldyń sáıkes kezeńimen salystyrǵanda syrqattanýshylyqtyń 6 ese tómendeýi baıqalady.