Jyl basynan beri Qazaqstannyń teńiz porttary arqyly 6,2 mln tonna júk tasymaldandy

ASTANA. KAZINFORM - Bıylǵy 10 aıda Qazaqstannyń teńiz porttary arqyly 6,2 mln tonna júk tasymaldandy. Bul týraly QR Kólik mınıstrliginiń temirjol jáne sý kóligi komıteti habarlady.

Ótken jylmen salystyrǵanda teńiz kóligi arqyly tasymaldaý kólemi 3%-ǵa, onyń ishinde tranzıttik júkterdi tasymaldaý 18%-ǵa ósti.

«Quryq parom kesheni arqyly júk avtokólik quraldaryn óńdeýde 22%-ǵa ósý baıqalady. Aqtaý porty arqyly ótken 27 myńǵa jýyq konteınerdi qosa alǵanda, „Shyǵys-Batys“ tranzıttik qatynasyndaǵy konteıner tasymalynyń kólemi 84% — ǵa ulǵaıǵan», — dep jazdy mınıstrlikten.

Sondaı-aq, bıyl Quryq portynyń «Sarja» termınaly atalǵan kezeńde Túrkııa men Iran baǵytynda shamamen 55 myń tonnaǵa jýyq júk (tústi metaldar, ammofos, arpa) óńdedi.

Sonymen qatar, Quryq portynyń «Ersaı» teńiz termınalynan 2024 jyly Qazaqstan arqyly Ázirbaıjannan Ózbekstanǵa tranzıtpen 153 gabarıtti emes júk tasymaldandy.

Aıta keteıik, bıyl qazan aıynda Quryq portynda jylyna qýaty 1 mln tonnany quraıtyn taǵy bir astyq termınaly qoldanysqa engizildi. Sonymen qatar, Memleket basshysynyń tapsyrmasy aıasynda Quryq portynyń bazasynda tolyqqandy logıstıkalyq klaster qurý jumysy belsendi júrip jatyr.