Jyl basynan beri Qazaqstanda 373 avtokólik órtengen

ASTANA. KAZINFORM – Qys mezgilinde avtokólikterdiń órtený qaýpi edáýir artady. Jyl basynan beri elimiz aýmaǵynda 373 kólik órtengen.

Mamandardyń málimetinshe, aıazdy kúnderi muzdap qalǵan bólshekter men agregattardy ashyq otpen jylytý áreketteri saldarynan kólik órtteri jıileıdi. Kólikti jylytý úshin ashyq otty qoldanýǵa qatań tyıym salynady. Bul azamattardyń ómiri men múlkine naqty qaýip tóndiredi.

- Avtokólikterdiń órtenýiniń negizgi sebepteri – elektr júıesiniń aqaýlary, symdar oqshaýlaýynyń zaqymdanýy, janarmaı men maıdyń aǵýy, agregattardyń qyzyp ketýi, sondaı-aq qosymsha elektr qurylǵylaryn ornatý kezinde týyndaıtyn qysqa tuıyqtalý. Tehnıkalyq aqaýy bar kólikti paıdalaný órt qaýpin edáýir arttyrady.

Avtokólikte janǵysh materıaldar kóp. Tipti bolmashy aqaýdyń ózi ot kóziniń áserinen órttiń tez taralýyna jáne kóliktiń tolyq janyp ketýine ákelýi múmkin, - deıdi mamandar.

Tótenshe jaǵdaılar mınıstrligi avtokólik ıelerine kólikti ýaqtyly tehnıkalyq qyzmetten ótkizýge, elektr jáne janarmaı júıesiniń jaı-kúıin turaqty baqylaýǵa, aqaýy anyqtalǵan kólikti paıdalanbaýǵa, kólikte árdaıym jaramdy órt sóndirgishtiń bolýyn qamtamasyz etýge jáne muzdap qalǵan bólshekterdi jylytý úshin ashyq otty qoldanbaýǵa keńes beredi.

Mamandar, ásirese aýa temperatýrasy tómendegen kezeńde qaýipsizdik sharalaryn qatań saqtaýǵa shaqyrady.

Aıta keteıik, keshe Astanada salynyp jatqan LRT stantsııasy mańynda órt shyqty.