Jyl basynan beri Qazaqstan tarapynan izdeýde júrgen 27 qylmysker Reseıde ustaldy
ASTANA. KAZINFORM - Jyl basynan beri Reseı Federatsııasynyń aýmaǵynda Qazaqstan ishki ister organdary izdestirip júrgen 27 qylmysker anyqtaldy. Olardyń 14-i ustalyp, 13 adamnyń júrgen jeri belgili boldy.
Óz kezeginde qazaqstandyq polıtseıler reseılik áriptesteri úshin izdeýde júrgen 212 adamdy anyqtady. Olardyń ishinde 31 qylmysker ustalyp, 180 adamnyń júrgen jeri anyqtaldy, - dep habarlaıdy Polisia.kz.
Birlesken jumystyń nátıjeleriniń biri retinde Aqtaý qalasynyń áýejaıynda memleketaralyq izdeýde júrgen er adamnyń ustalǵanyn atap ótýge bolady. Ol Baký qalasyna ushyp ketpek bolǵan kezde qolǵa túsip, ýaqytsha ustaý ızolıatoryna qamaldy.
Tergeý málimetinshe, 2012 jyly Reseı Federatsııasynyń Kalýga qalasynda kúdikti janjal barysynda úı ıesiniń basyna shabatyn zatpen úsh ret soqqy jasaǵan. Alǵan jaraqattarynyń saldarynan áıel oqıǵa ornynda kóz jumǵan.
Sonymen qatar Reseı Federatsııasynyń Vladıkavkaz qalasynda jedel-izdestirý sharalary barysynda polıtsııa qyzmetkerleri halyqaralyq izdeýde júrgen Qazaqstan azamatyn ustady. Ol asa iri kólemde alaıaqtyq jasady degen kúdikke ilingen.
Tergeý málimetinshe, 2022 jylǵy 14 qańtarda Shymkent qalasyndaǵy avtosalondardyń birinde er adam jergilikti turǵynnan Toyota Camry avtokóligin 20 mıllıon teńgege satyp beremin degen syltaýmen alǵan. Keıin qujattardy qoldan jasap, kólikti belgisiz tulǵaǵa satyp jiberip, jábirlenýshige materıaldyq shyǵyn keltirgen.
Qazaqstan Іshki ister mınıstrligi eki eldiń quqyq qorǵaý organdary arasyndaǵy ózara is-qımyl jaýapkershilikten jaltaryp júrgen adamdardy tez anyqtap, ustaýǵa múmkindik beretinin, sondaı-aq qylmyspen kúrestegi halyqaralyq yntymaqtastyqty nyǵaıtýǵa yqpal etetinin atap ótti.
Osyǵan deıin Tbılısıde halyqaralyq izdeýde júrgen esirtki qylmyskerleri ustalǵany týraly jazdyq.
