Jyl basynan beri Qazaqstan Ózbekstanǵa 473 mln dollardyń taýaryn eksporttaǵan

TAShKENT. KAZINFORM – Qańtar-aqpan aılarynyń qorytyndysy boıynsha Qazaqstan Ózbekstannyń negizgi saýda seriktesteriniń úshtiginde qaldy, dep habarlaıdy Kazinform agenttiginiń menshikti tilshisi.

Ózbekstannyń Ulttyq statıstıka komıtetiniń aqparatyna saı, qańtar-aqpan aralyǵynda eldiń syrtqy saýda aınalymy 10,8 mlrd dollarǵa jetip, byltyrǵy kezeńmen salystyrǵanda 9,9%-ǵa ósti. Búgingi tańda kórshiles memleket álemniń 162 elimen saýda-sattyq jasaıdy.

Eldiń negizgi saýda seriktesteri kóshin Qytaı bastap tur. Eki memleket arasyndaǵy taýar aınalymy 2 mlrd dollardan (jalpy kólemniń 19,2%) asty.

Odan keıingi orynda saýda-sattyqtyń 14,9% úlesi tıesili Reseı tur. Bul elmen aradaǵy ımport-eksport kólemi 1,6 mlrd dollardan artyq.

Sonymen qatar, kóshbasshylardyń úshtigin Qazaqstan túıindeıdi. Bizdiń el men Ózbekstan arasyndaǵy taýar aınalymy 659,9 mln dollar (6,5%) boldy. Bul ótken jyldyń sáıkes kezeńimen salystyrǵanda 78,8 mln dollarǵa kóp.

Qamtylyp otyrǵan kezeńde Ózbekstan Qazaqstanǵa 186,1 mln dollardyń taýaryn eksporttap, 473,8 mln dollardan astam somaǵa taýar ımporttaǵan.

Eske salaıyq, resmı Astana men Tashkent ózara taýar aınalymyn 10 mlrd dollarǵa jetkizýge múddeli. Atalǵan kórsetkishke qol jetkizý úshin Qazaqstan men Ózbekstan arasynda qosymsha 4 saýda dálizi ashylýy múmkin.

Qosa ketsek, keıingi 5 aıda Qazaqstan Ózbekstanǵa 2 mln tonna astyq eksporttady.