Jyl basynan beri kásipkerlerge 500 mlrd teńge jeńildetilgen nesıe berildi – Farhat Sársekeev
ASTANA. KAZINFORM – Elimizde shaǵyn jáne orta bıznespen aınalysatyn kásipkerlerge ekinshi deńgeıli bankter arqyly jeńildetilgen nesıe berilip jatyr. Tolyǵyraq «Damý» kásipkerlikti damytý qorynyń basqarma tóraǵasy Farhat Sársekeev aıtyp berdi.
- 4,3 mln halyq shaǵyn jáne orta bızneste jumys isteıdi. Bizdiń maqsat – ári qaraı sapaly damytý. Birinshiden, sýbsıdııa – álemdik tájirıbeni zerttesek sýbsıdııalaý daǵdarys kezinde qysqa merzimde qoldanylatyn qural. Biz ony pandemııa, lokdaýn kezinde jaqsy qoldanyp, memleket, Úkimet qarjy bóldi. Shaǵyn jáne orta bıznes jabylyp qalmasyn dep qoldaý kórsetildi. Endi jyl basynan beri biz sýbsıdııadan jeńildetilgen nesıeleýge kóshtik. Bul Úkimettiń qalaýy, biz Úkimettiń operatorymyz. «Órleý» baǵdarlamasyn daıyndap naryqqa shyǵardyq, onyń ereksheligi bekitilgen mólsherlememen ekinshi deńgeıli bankter arqyly nesıe berý, - dedi Farhat Sársekeev Jibek joly telearnasynyń «Ýáde» baǵdarlamasyna bergen suhbatynda.
Búginde «Damý» qory 8 ekinshi deńgeıli bankpen jumys isteıdi.
- Onyń ereksheligi men qarjynyń 50 paıyzyn bankke berip, qalǵan 50 paıyzyn bank quıady. Osylaısha, jeńildetilgen 12,6 paıyzben qarjylandyryp otyrmyz. Biz barlyq salany qarjylandyrmaımyz, basym 5 sala bar. Olar –óndiris, bilim, densaýlyq, tasymaldaý jáne týrızm salasy. Atalǵan salalarǵa 7 mlrd teńgege deıin 12,6 paıyzben 10 jylǵa jeńildetilgen nesıe berip otyrmyz. Jyl basynan beri 1400 kásipkerge qoldaý kórsetip, 500 mlrd teńgege taıaý qarjylandyryldy. Bul tek shaǵyn jáne orta bıznes boıynsha, - dep tolyqtyrdy spıker.
Aıta keteıik, 2026 jyldan bankter aýyl sharýashylyǵyna jeńildetilgen nesıe berýge tartylady.