Jyl basynan beri Kaspıı teńizine 6 mlrd tekshe metrden astam sý jiberildi
ASTANA.KAZINFORM - Sý resýrstary jáne ırrıgatsııa mınıstri Nurjan Nurjigitov Atyraý oblysynyń turǵyndarymen eseptik kezdesý ótkizdi. Jıynda vedomstvo basshysy sý salasynda atqarylyp jatqan jumystar týraly baıandady.
Mınıstrlik qurylǵan sátten bastap sý teńgeriminiń saqtalýyna turaqty baqylaý júrgizilip, sý resýrstary ekonomıkalyq jáne ekologııalyq qajettilikter arasynda naqty bólinip keledi. Jaıyq-Kaspıı basseındik ınspektsııasynyń málimetinshe, sońǵy 2,5 jylda Kaspıı teńizine 35 mlrd tekshe metrden astam sý jiberilgen. Onyń ishinde shamamen jartysy - 17 mlrd tekshe metrden astam sý 2024 jyly tirkelgen aýqymdy sý tasqyny kezeńine tıesili. Al 2026 jyldyń basynan beri Kaspıı teńizine 6,16 mlrd tekshe metr sý baǵyttaldy.
Jańa Sý kodeksin iske asyrý maqsatynda mınıstrlik Qazaqstandaǵy ónerkásiptik kásiporyndardy túgendeý jumystaryn aıaqtady.
Eske salaıyq, byltyr qabyldanǵan Sý kodeksine sáıkes kásiporyndar bes jyldyq merzimge arnalǵan aınalymdy sýmen jabdyqtaý júıesine kóshý josparyn ázirleýge mindetti. Sonymen qatar qoldanystaǵy júıeler eń úzdik qoljetimdi tehnologııalardy paıdalana otyryp jańǵyrtylýy tıis.
Qazirgi ýaqytta osyndaı 168 jospar ázirlengen. Mundaı qujattardy elimizdegi barlyq kásiporyn daıyndaýy qajet.
Memlekettik qoldaý sharalarynyń arqasynda Qazaqstanda sý únemdeý tehnologııalaryn engizý qarqyny bes ese artty. 2024 jylǵa deıin mundaı tehnologııalar jyl saıyn orta eseppen 30 myń gektar alqapqa engizilse, 2024 jáne 2025 jyldary bul kórsetkish jylyna 150 myń gektarǵa jetti.
Byltyrdyń qorytyndysy boıynsha Atyraý oblysynda jańbyrlatyp jáne tamshylatyp sýarý júıeleri arqyly 9,3 myń gektar jer sýarylyp, nátıjesinde 12,8 mln tekshe metr sý únemdeldi. Al bıyl sý únemdeý tehnologııalary qosymsha 800 gektar aýmaqta engizildi.
- Bizdiń mindetimiz - sý resýrstaryn utymdy ári únemdi paıdalanýdy qamtamasyz etý, sondaı-aq sý shyǵynyna jol bermeı, ony naqty qajet jerlerge, ıaǵnı egistik alqaptarǵa, kásiporyndarǵa jáne azamattardyń úılerine ýaqytyly jetkizý. Sý - turaqty damýdyń, azyq-túlik qaýipsizdiginiń jáne halyqtyń ál-aýqatynyń negizi. Sondyqtan ınfraqurylymdy jańǵyrtý jáne zamanaýı tehnologııalardy engizýmen qatar, sýdy jaýapkershilikpen paıdalaný mádenıetin qalyptastyrýdyń mańyzy zor. Tek kúsh-jigerimizdi biriktirý arqyly ǵana bolashaq urpaq úshin sý qoryn saqtap qala alamyz, - dedi Sý resýrstary jáne ırrıgatsııa mınıstri Nurjan Nurjigitov.
Kezdesýde Atyraý oblysynyń turǵyndary mınıstrge jańa sý qoımasyn salý, jerasty sý kózderin barlaý, sý únemdeý tehnologııalaryn engizý úshin elektr energııasyn sýbsıdııalaý jáne ırrıgatsııalyq kanaldardy rekonstrýktsııalaý máseleleri boıynsha suraqtar qoıyp, usynystaryn jetkizdi.
Budan keıin azamattardy jeke qabyldaý ótti. Onda kanaldar arqyly sý jetkizýdiń turaqtylyǵyn qamtamasyz etý máselesi talqylandy. Eseptik kezdesýdiń qorytyndysy boıynsha Nurjan Nurjigitov jaýapty departamentterdiń basshylaryna naqty tapsyrmalar berdi.
Aıta keteıik, Kaspıı, Aral jáne Balqash basseınderinde pılottyq sý jobalary ázirlenýi múmkin.
