Jyl basynan beri qansha turǵyn úı alańy paıdalanýǵa berilgeni aıtyldy
ASTANA. KAZINFORM — 2025 jylǵy qańtarda qurylys jumystarynyń kólemi 12,7% ósip, 140,5 mlrd teńgeni qurady.
2024 jylǵy qańtarmen salystyrǵanda jumys kóleminiń ulǵaıýy turǵyn emes ǵımarattar (42,2%) men ǵımarattar (15%) qurylysy men olardyń jóndeý jumystary kóleminiń ósýimen baılanysty.
Respýblıka boıynsha qurylys jumystarynyń jalpy kóleminiń 81,6% jeke qurylys uıymdary oryndaǵan, sheteldikter – 17,8%, memlekettik uıymdar – 0,6%.
2025 jylǵy qańtarda oryndalǵan qurylys jumystarynyń (qyzmetteriniń) túrleri boıynsha eń kóp úlesti turǵyn emes ǵımarattar (jalpy kólemge 36,9%) men avtomobıl joldary (17,6%) jáne turǵyn úıler (6,2%) qurylysy alyp otyr.
Óńirlik bóliniste qurylys jumystary kóleminiń ulǵaıýy respýblıkanyń on segiz aımaǵynda baıqaldy. Aıtarlyqtaı ósim Shymkent qalasynda (2,9 ese), Mańǵystaý (2,7 ese), Aqmola (2,3 ese), Jetisý (2,1 ese), Batys Qazaqstan (86,2%), Abaı (74,8%), Shyǵys Qazaqstan (69,7%), Qyzylorda (67,2%), Pavlodar (49,7%), Qostanaı (45,6%), Jambyl (33,1%), Ulytaý (32,3%), Qaraǵandy (23,4%) oblystarynda jáne Astana (71,3%) qalasynda baıqalǵan.
2025 jyldyń qańtarynda paıdalanýǵa berilgen jańa nysandardyń jalpy alańy 942,8 myń sharshy metr. Onyń ishinde turǵyn úıdiń jalpy alańy 2024 jyldyń qańtarymen salystyrǵanda 26,9% azaıyp, 766,1 myń sharshy metrdi qurady.
Bilim berý salasynda 2025 jyldyń qańtarynda 3090 oqýshyǵa arnalǵan 3 jalpy bilim beretin mektep pen 600 oryndyq 2 balabaqsha paıdalanýǵa berildi.
Buǵan deıin elordada qurylysy uzaqqa sozylǵan saýda ortalyǵy satylymǵa qoıylǵanyn jazdyq.