Jyl basynan beri ıpotekalyq baǵdarlamalar boıynsha 11 myńnan astam nesıe berildi
ASTANA. KAZINFORM – Qazaqstannyń qurylys salasynda aýqymdy tsıfrlyq transformatsııa iske qosyldy. Ónerkásip jáne qurylys mınıstrliginiń negizgi jobalarynyń biri Biryńǵaı tsıfrlyq ekojúıeni — qoldanystaǵy aqparattyq júıelerdi almastyratyn «Tapsyrys berýshiniń biryńǵaı terezesin» ázirleý boldy. Bul týraly Úkimettiń baspasóz qyzmeti málim etti.
Jańa portal egov.kz platformasymen biriktiriledi jáne qala qurylysyn josparlaýdan bastap nysandardy paıdalanýǵa berýge deıingi qurylysty súıemeldeýdiń tolyq tsıklin qamtamasyz etedi.
Turǵyn úı salasynda áleýmettik osal toptaǵy azamattar úshin 7% jáne qalǵan sanattar úshin 9% mólsherlemeleri bar «Naýryz» ıpotekalyq baǵdarlamasy iske qosyldy. 2025 jyldyń basynan bastap baǵdarlama sheńberinde 202 mlrd teńgeden astam somaǵa 7 746 qaryz berildi.
Sondaı-aq, «Baqytty otbasy» baǵdarlamasyn iske asyrý jalǵasyp jatyr, ol boıynsha 2019 jyldan 2024 jylǵa deıin 7 myńnan astam kópbalaly otbasy turǵyn úımen qamtamasyz etildi, al 2025 jyly taǵy 1 myńnan astam otbasyn qamtý josparlanǵan.
2020-2025 jyldarǵa arnalǵan «Nurly jer» baǵdarlamasy TKSh-ny damytýdyń júıeli tásilin qamtamasyz etedi: jumys bastalǵannan beri 2 myńnan astam kóppáterli úı kúrdeli jóndeýden ótti, tek 2024 jyly — 233 nysan. 2025 jylǵa taǵy 421 úıdi jóndeý josparlanǵan. Monoqalalar men aýyldyq aýmaqtardy damytýǵa erekshe kóńil bólinedi. «Otaý», «Asyl meken» jáne «Naýryz» baǵdarlamalary jeńildetilgen turǵyn úıdi, onyń ishinde ekinshi naryqtyda qarastyrady, bul ásirese halqy az óńirler úshin mańyzdy.
Sondaı-aq, jaıly jáne turaqty turǵyn úı ortasyn jobalaýdyń biryńǵaı erejelerin belgileıtin jańa «Qalalardy keshendi standarttaý» ázirlendi. Barlyq sharalardy keshendi júzege asyrý turaqty qurylys ekojúıesin qalyptastyrady. Jumyspen qamtýdyń ósýine, qalalyq ortanyń sapasyn jaqsartýǵa jáne halyqtyń barlyq sanattary úshin turǵyn úıge qoljetimdilikti keńeıtýge yqpal etedi.
Buǵan deıin habarlanǵandaı, ıpoteka boıynsha jyldyq tıimdi syıaqy mólsherlemesi 20%-ǵa tómendedi.