Jyl basynan beri Grýzııa eksporty 20 paıyzdan astam ósti
ASTANA. KAZINFORM — Qańtar-sáýir aılarynda Grýzııa syrtqy naryqtarǵa eksport kólemin kúrt arttyrdy – jetkizilim kólemi 21,1 paıyzǵa ósip, 2,44 mıllıard dollarǵa jetti. Al ımport 4,9 paıyzǵa qysqardy. Bul týraly Grýzııa Ulttyq statıstıka qyzmetiniń (Geostat) derekterine silteme jasaǵan Kazinform agenttiginiń óńirdegi menshikti tilshisi habarlady.
Ulttyq statıstıka qyzmetiniń málimetine sáıkes, qańtar-sáýir aılaryndaǵy Grýzııanyń syrtqy saýda aınalymy 8,13 mıllıard dollar bolyp, ótken jyldyń sáıkes kezeńimen salystyrǵanda nebári 1,7 paıyzǵa artqan. 2026 jyldyń alǵashqy tórt aıynda eksport kólemi 2,44 mıllıard dollarǵa jetse, ımport 5,69 mıllıard dollar bolǵan. Saýda balansynyń teris saldosy 3,25 mıllıard dollar deńgeıinde saqtalǵanymen, tapshylyq ótken jylmen salystyrǵanda azaıa bastaǵan.
Kóktem aılaryndaǵy kórsetkishter erekshe nazar aýdartty. Sáýirde Grýzııa eksporty 716,2 mıllıon dollarǵa jetip, bul jyl basynan bergi eń joǵary aılyq kórsetkishterdiń biri boldy. Salystyrmaly túrde aıtsaq, 2025 jyldyń sáýirinde eksport kólemi 616,8 mıllıon dollar bolǵan edi.
Ekonomısterdiń aıtýynsha, eksporttyń munshalyqty jyldam ósýi eldiń tranzıttik jáne reeksporttyq belsendiliginiń artýyn, sondaı-aq grýzın ónimderiniń jekelegen sanattaryna syrtqy naryqtaǵy suranystyń qalpyna kele bastaǵanyn kórsetýi múmkin.
Sonymen qatar ımport dınamıkasy keri úrdisti baıqatty. 2025 jyldyń basynda ımport kólemi rekordtyq deńgeıde ósip, tek qańtar aıynyń ózinde 1,7 mıllıard dollardan asqan bolatyn. Al 2026 jyly kórsetkishter birshama turaqtalǵan. Sáýir aıynda ımport kólemi 1,48 mıllıard dollarǵa deıin tómendedi. Bul kórsetkish byltyrǵy sáıkes kezeńde 1,53 mıllıard dollar bolǵan.
Osy jaǵdaı aıasynda syrtqy saýda aınalymyndaǵy saýda tapshylyǵynyń úlesi 40 paıyzǵa deıin qysqardy. Bul Grýzııa ekonomıkasy úshin aldyńǵy jyldarmen salystyrǵanda anaǵurlym qolaıly kórsetkish sanalady.
Eske salsaq, 2025 jyldyń qańtar-qarasha aılarynda Qazaqstan Grýzııanyń syrtqy saýdasyndaǵy jetekshi elderdiń biri bolyp, grýzın eksportynyń eń iri úsh baǵytynyń qataryna engen edi.
Aıta ketelik Grýzııa temirjol jańǵyrtýǵa 370 mln dollardan astam ınvestıtsııa salǵan edi.
