Jyl basynan beri elordada 13 bala terezeden qulap, kóz jumdy

ASTANA. KAZINFORM – Búginde elimizde balalardyń terezeden baıqaýsyzda qulap ketý oqıǵasy mańyzdy bolyp tur. 

Balalar qaýipsizdigine qatysty sońǵy málimetpen Astana qalasy tótenshe jaǵdaılar departamenti bastyǵynyń orynbasary Qanat Altynbekov bólisti.

– Búginde kópqabatty turǵyn úılerdiń terezesinen balalardyń qulaý oqıǵalary alańdatýshylyq týǵyzyp otyr. Jyl basynan beri elordada 52 jaǵdaı tirkeldi, nátıjesinde 39 bala jaraqat alyp, 13 bala qaıtys boldy. Respýblıka boıynsha 150 oqıǵa tirkeldi, 137 bala jaraqat alyp, 21-i qaıǵyly jaǵdaımen aıaqtaldy, - dedi Qanat Altynbekov Astana qalasy kommýnıkatsııalar qyzmeti alańynda ótken baspasóz máslıhatynda. 

Spıkerdiń aıtýynsha, balalardyń terezeden qulaý jaǵdaıynyń negizgi sebepteri: 

- terezege qorǵaý tory qoıylmaǵan; 

- balany qaraýsyz qaldyrý. 

- Ata-ana men zańdy ókildiń jaýapkershiligi mańyzdy. Zańnamaǵa sáıkes balalardy qaraýsyz qaldyrǵan jaǵdaıda ákimshilik jáne qylmystyq jaýapkershilik qarastyrylǵan. Ata-analardy balanyń qaýipsizdigine beı-jaı qaramaýǵa shaqyramyz, - deıdi ol. 

Aıta ketsek, osy shildede elordada bir kúnde 4 bala terezeden qulap, ekeýi mert boldy.  

Sondaı-aq bala terezeden qulap ketpeý úshin ne isteý kerektigi týraly jazǵan edik.