Jyl basynan beri elimizdegi kontsertterdi 1,7 mıllıonnan asa adam tamashalady
ASTANA. KAZINFORM — 2026 jyldyń alǵashqy jartyjyldyǵynda respýblıkadaǵy kontsert uıymdary 2966 mádenı is-shara ótkizip, olardy 1 752 940 adam tamashalaǵany belgili boldy.
Mádenıet jáne aqparat mınıstrliginiń baspasóz qyzmetiniń málimetinshe, kontsertter, gastrolder men shyǵarmashylyq jobalar elimizdiń iri qalalarymen qatar, ózge óńirlerinde de uıymdastyryldy.
Búginde elimizde 35 kontsert uıymy jumys isteıdi, onyń 7-eýi respýblıkalyq deńgeıde qyzmet etedi.
Mádenı uıymdar ulttyq ónerdi nasıhattap, shyǵarmashyl ujymdardy el arasynda keńinen tanytyp keledi. Alǵashqy jartyjyldyqtaǵy aýqymdy mádenı jobalardyń biri — «Halyq áýeni» kontserttik-gastroldik týry.
— 21-23 mamyr aralyǵynda ótken joba elimizdiń 17 óńirin qamtydy. Úsh kún ishinde shalǵaı aýdandar men aýyldyq eldi mekenderde 51 kontsert uıymdastyrylyp, olardy 20 myńǵa jýyq adam tamashalady. Joba aıasynda halyq ánderi, sımfonııalyq mýzyka, zamanaýı estrada, mıýzıkl jáne horeografııalyq qoıylymdar kópshilikke usynyldy. Kórermenge respýblıkalyq jetekshi shyǵarmashylyq ujymdar, «Qazaqkontserttiń» ónerpazdary, orkestrler, bı ansamblderi, opera solısteri men dástúrli óner ókilderi óz shyǵarmashylyǵyn pash etti, — delingen habarlamada.
Joba tek kontserttik baǵdarlamamen shektelmeı, shyǵarmashylyq júzdesýlermen de jalǵasyn tapty. Óńirlerde uıymdastyrylǵan 8 kezdesý men sheberlik sabaǵynda kópshilik tanymal óner ıelerimen júzdesip, olardyń shyǵarmashylyǵymen tanysty. Jas ónerpazdar úshin bul kezdesýler tájirıbe almasyp, sheberligin shyńdaıtyn taǵylymdy alańǵa aınaldy. Alǵashqy jartyjyldyqta el ishindegi gastrol aıasynda 39 kontsert uıymdastyryldy. Olardy 17 012 kórermen tamashalady.
Kontsertter Astana, Almaty qalalarynda, sondaı-aq Pavlodar, Aqtóbe, Mańǵystaý, Qostanaı, Aqmola, Almaty, Qyzylorda, Abaı jáne Jetisý oblystarynda ótti. Jyl basynan beri kontsert uıymdary kórermenge mereıtoılyq keshterden bastap, folklorlyq, akademııalyq jáne zamanaýı baǵyttaǵy san alýan shyǵarmashylyq jobalardy usyndy. Olardyń qatarynda «FLOW/AǴYN», «Ómir — qazyna», «Otan ana», «Adam daýysy» monooperasy, jasandy ıntellekt tehnologııasy qoldanylǵan «Áýenge aınalǵan sezim» kontserti jáne Qurmanǵazy atyndaǵy Qazaq ulttyq halyq aspaptar orkestriniń FOLK SHOW NAURYZ sekildi jańa jobalary bar.
Buǵan deıin Qurmanǵazy orkestriniń Ulttyq dombyra kúnine arnalǵan kontsertterin 2000-nan astam adam tamashalaǵanyn jazdyq.
