Jyl basynan beri elimizdegi bazarlardan 150 tıimsiz deldal saýda tizbeginen shyǵarylǵan
ASTANA. KAZINFORM – Bul týraly QR Saýda jáne ıntegratsııa mınıstri Arman Shaqqalıevtiń tóraǵalyǵymen azyq-túlik bazarlarynda tártip ornatý jáne taýar ótkizý tizbekterindegi tıimsiz deldaldardy qysqartý máselelerine arnalǵan keńes barysynda málim boldy.
Aıta keteıik, jıynda saýda salasynyń ashyqtyǵyn arttyrýǵa, kóleńkeli shemalardy joıýǵa jáne áleýmettik mańyzy bar azyq-túlik ónimderiniń baǵasyn baqylaýda ustap, halyqqa qoljetimdi bolýyn qamtamasyz etýge baǵyttalǵan júıeli jumys máselesi talqylandy. Negizgi mindet – óndirýshi men tutynýshy arasyndaǵy artyq alyp-satarlardy qysqartyp, baǵa qalyptastyrý úderisin barynsha túsinikti ári baqylaýǵa bolatyn deńgeıge jetkizý.
Qazirgi tańda bul jumys tájirıbelik kezeńge kóshti. Óńirlerdegi baǵa jaǵdaıyna eleýli yqpal etetin 63 negizgi bazar aıqyndaldy. Atalǵan nysandarda kóshpeli tekserýler, monıtorıng jáne túsindirý jumystary júrgizilip jatyr. Sońǵy kezeńde ǵana «Altyn Orda» men «Barys-4» sekildi iri saýda oryndaryn qosa alǵanda, 18 bazar qamtyldy. Tekserý qorytyndysy boıynsha 486-ǵa jýyq zańbuzýshylyq anyqtalyp, olardyń árqaısysy boıynsha tıisti sharalar qabyldaný ústinde.
-Sonymen qatar taýar ótkizý tizbekterindegi tártipti kúsheıtý jumystary júrgizilip jatyr. Jyl basynan 150 tıimsiz deldal shyǵaryldy. Tekserý nátıjesinde kontrafaktilik jáne tańbalanbaǵan ónimder, kóleńkeli aınalym, kassalyq tártiptiń buzylýy, eńbek qatynastarynyń rásimdelmeýi jáne saýda oryndaryn birneshe márte qosalqy jalǵa berý faktileri anyqtaldy, – dedi QR SIM Saýda komıtetiniń tóraǵasy Ernur Jáýtikbaev.
Keńeste zańsyz ónim aınalymy máselesi de talqylandy. Qoldanystaǵy shekteýlerge qaramastan, birqatar óńirlerde qajetti qujattary men tańbalaýy joq ımporttyq taýyq jumyrtqalaryn satý faktileri anyqtalǵan. Jalpy alǵanda, zańsyz aınalymnan shamamen 32,5 myń dana jumyrtqa tárkilendi. Sondaı-aq tárkilengen ónimderdi joıý kezinde mindetti túrde beınefıksatsııa júrgizý jáne memlekettik organdar arasyndaǵy ózara is-qımyldy kúsheıtý qajettigi atap ótildi.
Keńeske oblys ákimderiniń orynbasarlary, sondaı-aq QR Aýyl sharýashylyǵy mınıstrligi, Qarjy mınıstrligi, Іshki ister mınıstrligi, Densaýlyq saqtaý mınıstrligi, Tótenshe jaǵdaılar mınıstrligi jáne Básekelestikti qorǵaý jáne damytý agenttiginiń ókilderi qatysty.
Osyǵan deıin Almaty bazarynda 13 myńnan astam zańsyz ákelingen taýyq jumyrtqasy anyqtalǵany týraly jazdyq.
