Jyl basynan beri elimizde adam saýdasyna qatysty 75 is tirkelgen
ASTANA. KAZINFORM — QR ІІM Uıymdasqan qylmysqa qarsy kúres departamentiniń jedel ýákili Ámirjan Aǵeleýov elimizdegi adam saýdalaý qylmysyna qatysty sońǵy statıstıkalyq derekterdi málim etti.
Іshki ister mınıstrliginiń deregine sáıkes, 2024 jyly adamdy erkinen tys bas bostandyǵyn shekteýge qatysty barlyq bap boıynsha 207 fakt anyqtalǵan. Al byltyr 203 oqıǵa bolsa, bıyl 4 aıda 75 jaǵdaı tirkelgen. Onyń ishinde tikeleı 128-bap («Adam saýdasy») boıynsha 4 is qozǵalǵan.
– QR Qylmystyq kodeksiniń 128-baby (Adam saýdasy) boıynsha 2024 jyly – 14, 2025 jyly – 12 fakt tirkelse, bıylǵy alǵashqy 4 aıda – 4 derek anyqtaldy. Bul latentti qylmys bolǵandyqtan, tergeý is-áreketterinde dáleldeý bazasyna qatysty qıyndyqtar jıi týyndaıdy. Bıyl bul baǵytta joǵary dınamıka joq. Biraq jeńgetaılyq qylmystar men zańsyz áreket jasalatyn oryndardy uıymdastyrý jáne júrgizý faktileri jıi kezdesedi, – deıdi Ámirjan Aǵeleýov.
Elimizde adam saýdasyna qatysty birneshe bap kózdelgen. Olar:
· 116-bap – Adamnyń tinderin nemese aǵzalaryn alyp qoıýǵa májbúrleý
· 125-bap 3-bólik 2-tarmaq – Adam urlaý
· 126-bap 3-bólik 2-tarmaq – Bas bostandyǵynan zańsyz aıyrý
· 128-bap – Adam saýdasy
· 134-bap – Kámeletke tolmaǵan adamdy jezókshelikpen aınalysýǵa, seksýaldyq sıpattaǵy ózge de qyzmetterdi kórsetýge tartý
· 135-bap – Kámeletke tolmaǵandar saýdasy
· 308-bap – Jezókshelikpen aınalysýǵa tartý
· 309-bap – Prıton uıymdastyrý nemese ustaý jáne jeńgetaılyq
Aıta keteıik, buǵan deıin ótken jyly shet elderde 40-tan astam qazaqstandyqtyń quldyqtan bosatylǵany týraly jazǵan edik.
